ASSIT & VIDEO Ukkusissaq saniatigooralugu aningaasarsiutaasinnaavoq

Danmarkimi Kalaallit Nunaannilu ujarassiuutut misissuisoqarfik, GEUS, Nuup kangerluani Qeqertarsuarmi sapaatit-akunnerata naanerani isumasioqatigiissitsivoq, ilaatigut ukkusissaq atorlugu qiperuinissamut, atortussanut kusanartulianut annikitsumillu aatsitassarsiorluni inuussutissarsiornissamut isumassarsianik siuarsaanissaq siunertaralugu.

- Qangaaniilli kulturitta ilagiuarsimavaa. Ukkusissallu atorneqartuarnissaa neriuutigaarput. Nunatsinni peqarluarpugut, aamma inuit paasisariaqarpaat pisuussutaasoq suli pigisarput, ujarassiooq Majken Djurhuus Poulsen KNR-imut taama oqarpoq.
 

Kukimmik kiliortorneqarsinnaavoq

Qanganisarsiuut Ikkattuni ukkusissanik ukiut 1000-it ingerlanerini sulianik naassaavisa, soorlu igat ukkusissamik sanaat, avatangiiseralugit, Majken Djurhuus Poulsenip suleqatini Arent Heilmann aamma Nynke Keulen peqatigalugit atortussiaq aqitsoq qanoq takusinnaaneripput nassuiarpaat, aammalu asbestimik akullit qanoq immikkoortinneqarsinnaanersut nassuiaatigalugu.

- Qaamanerullunilu aqinnerusoq takusinnaavarput. Ukkusissap aqitsuunini ilisarnaatigaa, Arent Heilmann oqarpoq kukiminillu qaarsoq kiliorlugu.

Akilinermi Nunavummiut ukkusissanik qiperukkaminnik tuniniaallutik tapertaralugu aningaasarsiortarput, taamatullu suliaqarnerup isumassarsiorfigineqarnissaa GEUS-imeersut kissaatigaat. Taamaammat aamma eqqumiitsuliortut Peter ’Kujooq’ Kristiansen aamma Kristian Kristoffersen isumasioqatigiissitsinermi peqataatinneqarput.

Ikuttat, pilattuutit, angiutit siorartikkallu atorlugit ukkusissap qanoq suliarineqartarnera takutippaat, qiperugaasalu inerneraat arferup sarpia 500 koruunit missaannik naleqartoq.

- Nalunaaquttap akunnerata affaata missaa atorlugu naammassisarpakka, Kristian Kristoffersen oqarpoq.

Jens Christian Skovip Aatsitassanut aqutsisoqarfimmi Akuersissutinut immikkoortortaqarfimmeersup annikitsumik aatsitassarsiornissamut akuersissutit assigiinngitsut aamma atortussiat nalitunerusut tuniniarnissaannut suut pisariaqartinneqarnersut inuussutissarsiutiginissaanik siunertaqarlutik peqataasunut nassuiaateqarfigai. Paasissutissat allat uani atuarneqarsinnaapput.

Ukkusissaq igaliornermut qulliliornermullu ukiut 4.000-it matuma siorna Saqqaq-kulturimi atorneqarsimavoq.