Ukiuni sisamani patajaatsumik ingerlatsisoqarnissaa GME-p neriuutigaa

Siumup, Atassutip aamma Demokraatit Naalakkersuisooqatigiilernerat aatsitassarsioqatigiiffissuup, Greenland Minerals and Energyp nuannaarutigaa.
decembarip 05-at 2014 09:02

Narsap eqqaani Kuannersuarni aatsitassarsiornissamik pilersaarut kiisami aallartinneqarsinnaassasoq, GME isumaqarpoq.

 

- Ukiut arlallit pilersaarut ingerlareersoq eqqarsaatigalugu, Naalakkersuisooqatigiilersut suleqatigalugit aatsitassarsiornissamik pilersaarutip aallartinneqarnissaa neriuutigaarput, suliffeqarfissuaq GME allappoq.

 

Kim Kielsenip suliffeqarfiit aatsitassarsiornissamik pilersaaruteqartut pitsaasunik toqqammaveqarnissaannik oqalunnera, GME-p isumalluarnartoqartippaa.

AAMMA ATUARUK Kim Kielsen: Uran qaffasinnerpaaffilerneqassaaq

- Aatsitassarsiornissaq eqqarsaatigalugu patajaatsunik aningaasaliisussarsiorsinnaanissaq Kim Kielsenip partiip Siumut siuttuattut naqissusertarpaa, tamannalu isumalluarnarpoq.

 

Greenland Minerals and Energy tusagassiutinut allappoq neriorsuillutillu aatsitassarsiornissamik pilersaarutitik pillugit Kommune Kujallermut qanittukkut nalunaarusiulersaarlutik.

 

Aatsitassarsiorfiup aamma oqaatigaa, neriuutigalugu maanna Naalakkersuisunngortut ukiuni sisamani atuukkumaartut.