Ukiukitsunik atoqateqarsimanerit unnerluutigineri amerlisut

Nunatsinni politiit ukiumut nalunaarusiaata takutippaa 15-it inorlugit ukiulinnik atoqateqarnerit marloriaatinngorsimasut. 2015-imi unnerluuteqarnerit 31-upput, 2016-imilu unioqqutitsinerit 79-iullutik. Tassa unioqqutitsisut 48-inik amerleriarsimapput.

Meeqqanik kinguaassiutitigut atornerluinerit amerlisimaneranik isumaqartariaqanngilaq, politimester, Bjørn Tegner Bay KNR-imut oqarpoq.

Taassuma ilimagaa inuit meeqqanut kinguaassiutitigut atornerluinernik unnerluutiginnittarnermut pikkorinnerulersimasut.

- Pinerluuteqarnerulertoqarneranik paasinarsisitsisoqanngilaq, Bjørn Tegner Bay oqarpoq.

Taassumalu oqaatigaa, politiit, peqqinnissaqarfik meeqqallu pisinnaatitaaffii pillugit siunnersuisoqatigiit MIO suleqatigiillutik meeqqanik ukiukitsunik kinguaassiutikkut kanngutsaatsuliornerit oqaluuserinissaat paquminarunnaarsinniarsimagaat.

- Paquminarunnaarsilersimanissaa neriuutigaarput, taamaallunilu unnerluutiginnittut amerleriarlutik, Bjørn Tegner Bay oqarpoq.

Unioqqutitsinernit 79-init suliat ilaat suli suliarineqarmata erseqqissaatigineqassaaq.