Hemmeligheder fra Nuuk: 'Ukiorpassuarni isertugaatigaara'

Kalaallit arnat marluk DR3-p piviusulersaarusiaani nangeqattaartumi "Hemmeligheder fra Nuuk"-mi peqataapput, Nuummiut inuusuttut isertugaataasa annersaat saqqummiunneqarput, peqataanerlu killissanik qaangiinertaqartoq, inuusuttut KNR-imut oqaluttuaraat.

Paqumigisat soorlu suiaaqatinoortuuneq, imigassamik atornerluiffiusumi peroriartorneq, upperisamik soqutigisaqarneq, kulturikkut avissaartuunneq imminullu toqunnissamik eqqarsaateqartarneq nangeqattaartuliami eqqartorneqartut ilagaat. Tassani Nuummiut inuusuttut isertugaatasa annersaat saqqummiunneqarput. 

Piviusulersaarummi peqataaneq unammillernarlunilu killissamik qaangiinertaqartoq, peqataasup Arnannguaq Davidsen Labansenip oqaatigaa. Inuillu qanoq qisuariassanersut eqqarsaatersuutigisimavaa:

 - Eqqarsaatigiinnaavillugu saqqummiliivippoq, inuimmita qanoq qisuariassappat, qanoq tigussavaat. Oqaluukkunnaassavaannga? Taanna eqqarsaat pigiinnaavillugu artornartorujussuuvoq, Arnannguaq Davidsen Labansen KNR-imut oqarpoq. 

AAMMA ATUARUK Kalaallit inuusuttut isertukkatik DR-imi saqqummiukkaat

Isertugaatimi oqaluttuarinissaa aamma peqataasumut allamut tassalu Paninnguaq Heilmannimut unammillernarpoq. Imalu oqaluttuarpoq: 

 - Siullermik unitsiinnartariaqarlugu eqqumiilliorujussuarama assiliivik saaginnarlugu oqalorujoornissannut, kisianni piffissap ingerlanerani sungiukkiartorlugu oqalussinnaanngorpunga, Paninnguaq Heilmann, imminut toquttarneq pinaveersaartinniarlugu kattuffimmik "Inuuneruna Iggoraarsuk"-mmik aallarniisoq taama oqarpoq.

Ukiut arlallit isertuukkaa

Arnannguaq Davidsen Labansen ukiut arlallit isertugaateqarpoq. Qatanngummi imminut toqunnerata kingorna inuunera mumittutullusooq ippoq assullu imminut pisuutinneq misillerfigisimavaa. Imminut toqoriarsimanini, Arnannguup isertugaatigaa.

 - Ukiorpassuit isertugaatiginikuullugu qatsunnartorujussuuvoq, uanga nammineerlunga isertugaatigingaarakku ulluinnarni kamakkusuttarlunga annikkusuttarlugu kisiannilu soorlu ersigalugu qanoq ilaqutakka kammalaatikkalu qiusuariassanersut, Arnannguaq Davidsen Labansen oqarpoq.

AAMMA ATUARUK DR Nuummit inuusuttulersaarummik nangeqattaartuliortoq

Ilaquttani ilisarisimasanilu ajunngitsumik qisuariartut, nangeqattaartuliaq takutinneqareermat paasivaa:

 - Saqqummiutereermat kikkut tamarmik allarrattut pikkorinneraallutik, soorunalimi tamanna oqiliallannaqaaq, Arnannguaq Davidsen Labansen oqarpoq.

Nangeqattaartuliaq danskit kalaallinut isiginnittaariaasaannut iluaqutaajumaartoq, Paninnguaq Heilmannip neriuutigaa:

 - Moderniusugut, taanna paasitikkusunnartarnermik isumaqartaramik qangatut suli inuusugut. Kissaatiginartarnermik nalilersorneqannginnissaq, ilisimassagaat qanoq uagut inooriaaseqarnersugut, Paninnguaq Heilmann KNR-imut oqarpoq. 

DR3 online-ikkut aallakaatitassiat isigiinnaakkit

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!