Ujarassiorit 2015 aallartippoq

Ujarassiorit - nuna tamakkerlugu ujarassiornermik soqutigisalinnut tamanut unammisitsineq ukiormanna 2015-mut aallarteriivippoq. Ujarassiorit ukiut 27-it sinnerlugit ingerlanneqareerpoq.

Allattoq Jaaku Lyberth

juulip 02-at 2015 12:00

Ajugaasunut akissarsiassat akileraarutitaqanngitsut katillutik 120.000 kroniupput, taakkunanngalu ajugaasup 55.000 kr. pissarsiassaralugit, Namminersorlutik Oqartussat tugassiuutinut nalunaaruteqarlutik taama allapput.

Ujarassiorit Aatsitassanut Ikummatissanullu Naalakkersuisoqarfimmiit ingerlanneqarpoq aningaasalersorneqarlunilu.

GrønlandsBankip Inuussutissarsiutinut Aningaasaateqarfia aningaasaliisutut pingaarnertut 40.000 kroninik tapiivoq.

Aamma atuaruk Ujarassiorit 2014

Hudson Resources Inc., Ironbark Limited aamma North American Nickel Inc. tamarmik immikkut 10.000 kroninik tapiipput.

Ujarassiornermut peqataanermut paasissutissat nittartakkami ujassiorit.gl-imi atuarneqarsinnaapput.

Ujaqqat nassaarineqartut puui allattuiffissaallu Alakkerivinni pineqarsinnaapput unamminermi peqataasutut nassiussilernermi atugassat aammalu immersugassaq ateq, najukkap il.il. nalunaarsorneqarfissaat tassaniillutik.

Aamma atuaruk ”Ujarassiorit” ukiut 26-ssaanni maanna ingerlanneqarpoq

Nunap assinga ilanngunneqarpoq, tassani nassaarfik nalunaarneqassalluni. Nassiussineq akeqanngilaq.

Ujaqqat nassaarineqartut oktobarip aallaqqaataa 2015 nallertinnagu Aatsitassanut Ikummatissanullu Naalakkersuisoqarfimmut nassiunneqassapput.

Inuussutissarsiutiginagu ujarassiortut Kalaallit Nunaanni inuit allattorsimaffianni nalunaarsorsimasut kisimik peqataasinnaapput.