Ujaqqat seqummaanit paasisassat qilanaarai
Ujaqqat seqummai tonsit marluk aasaq kingulleq nassiunneqarput. Qattat nivaataaqqallu mikisut atorlugit katersisoqarpoq. Statens Naturhistoriske Museumip Novo Nordisk suleqatigalugit ujaqqat seqummaanik pilersaarusiami seqummat atortussiassanik marrartaqarnersut misissorpaat.
- Akiani Mâlutomi siullermik siorartarpugut. Aammali Ilulialimmi siorartarluta. Kangerlummili siorartaagut tarajoqarmata tarajuiarnissaat unammillernarpoq. Taamaammat sumi siorartartoqarnissaa kialuunniit oqaatigereersinnaanngilaa, Usisaatip pisortaa, Hans Gerstrøm oqarpoq.
Ujaqqat seqummai marrannguunnikuusarput. Akuutissaapput nunalerinermi naggorissaataasinnaasut. Seqummat pitsaappata, Usisaat ikiuunnissamut piareersimavoq.
- Kalaallit suliffeqarfiutaasa arlaata nunarsuarmi allamut tuninialersinnaanissaa neriuutigivipparput. Taamaaliortoqarsinnaassappat ajunngitsorujussuussaaq. Tamanna sulissutigaarput, Hans Gerstrøm KNR-imut oqarpoq.
Ujaqqat seqummai atorneqarsinnaalluartut, kalaallip ujarassiuup nunarsuarmi tusaamaneqarluartup Minik Rosingip sapaatip akunnerata siuliani inuussutissarsiutit pillugit ataatsimeersuarnermi Future Greenlandimi oqaatigaa.
- Atortussiassat tamakkua sermimiittut tassaapput nunarsuarmi nunaatilippapilussuit issuutiminni amigaatigisaat pisariaqartilluinnagarisaallu, Minik Rosing pilersaarusiami akisussaasoq oqarpoq.
