Ujajaasup pisiniarfimmi sulisut savilersorfigigai
Nuummi Kongevejimi Brugseneeraq arfininngornermi juunip 18-iani nalunaaqutaq 21.45 ujajaaffigineqarpoq.
Ujajaasoq 2000 koruunit missaannik karsimit tillippoq, sulisullu marluk ujajaasumik unitsitsiniaanerminni savilersorfigineqarput. Ujajaasup savik ukusartoq atorlugu sulisut assakkut niukkullu ikilerpai.
Politiit paasissutissaataat naapertorlugit, sulisut ujajaasoqarneranut atatillugu navianaatilimmik ikilerneqarsimanngillat, ujajaasoqarneratali kingorna napparsimmavissuarmut suliaritikkiartorsimapput.
Politiit paasiniaareersut angut 25-t missaannik ukiulik arfininngorup unnuaani tigusarineqarpoq. Taanna ulluni 25-ni maanna tigummigallarneqarpoq.
Angut inuusuttoq pinerluttulerinermi inatsimmi §112, stk. 1, nr. 2 ujajaaneq pillugu, unnerluutigineqarpoq. Ujajaanerup paasiniaaffigineqarnera pissutigalugu politiit suliamut tunngatillugu maannakkuugallartoq oqaaseqaqqissinnaanngikkallarput.