Qulaarpaa Nunanit allaneersut tikisinneqartariaqassasut
Tassami nunanit allanit sulisorineqartut pillugit inatsit sukaterneqarnissaanik, Inatsisartuni Inuussutissarsiornermut Ataatsimiititaliamit Naalakkersuisut upernaaq manna peqquneqarput.
- Massakkut pisariaqarpoq atorfissaqarpoq, taamatut avataaninngaanniit allatut ajornartumik tikisitsisariaqarneq, Visit Greenlandimi siunnersorti Mads Daniel Skifte KNR-imut oqarpoq.
Nunatsinni takornariaqarneq nunatta aningaasaqarneranut tapiinerussappat, taamatullu Naalakkersuisut Napatitsinermut Siuariartortitsinissamullu Pilersaarutaat piviusunngussappat, nunanit allanit tikisitanik sulisoqarnissaq pinngitsoorneqarsinnaanngitsoq, takornarialerisut arlallit isumaqarput.
Aamma atuaruk Qulaarpaa Takornariaqarneq illersorneqartariaqartoq
Kujataani Jacky Simoudip takornariartitsisartoq, Blue Ice ingerlataraa, nunaqavissunillu sulisuusinnaasunik, piukkunnartunillu ukiut tamaasa nassaarsinnaasanngilaq.
Takornarianik sullissinissami piffissamik ataqqinninneq sullissilluarsinnaanerlu ilaatigut amingaataasartut, taanna isumaqarpoq, aammali oqaatsinik atuisinnaaneq ajornartorsiutaasarpoq.
- Ilumoorlunga oqartariaqarpunga oqaatsinik atuisinnaasumik nassaarnissaq ajornakusoorpoq, Kujataani Blue Icemik piginneqataasoq, Jacky Simoud KNR-imut oqarpoq.
Kalaallit takornarianik qajariartitsisinnaasut, sermersuarmi pisuttuaassisinnaasut kuunnullu aalisariartitsisinnaasut taassumap ujartorpai.
AAMMA ATUARUK Angalatitsisartoq najukkami suliniutinik ujartuisoq
Najugaqavissuinnarnillu takornarialerisinnaasunik nassaarniarneq ajornakusoortartoq, Visit Greenlandip nalilerpaa.
- Soorunami tamatta kissaatigigaluarparput nunatsinni takornarialerisut, imaluunniit takornariartartut nunatsinni takornarialerisuninngaanniit tamaninngaanniit sullinneqarnissaat, kisiannili taama amerlatigitillugit ajornakusoortorujussuuvoq, Mads Daniel Skifte oqarpoq.
AAMMA ATUARUK Takornariaqarnerup inerisarnissaa suliassarujussuuvoq
Inatsisartut upernaaq manna ataatsimiinnerminni aalajangiiffigisaanni, Naalakkersuisut peqquneqarput nunanit allanit nunatsinnut suliartortartut pillugit inatsit sukaterneqassasoq. Tamannali siuariartortitsinerunngitsoq, Jacky Simoud isumaqarpoq.
- Ajorluinnarpoq. Isumaqarpunga takornarialerinerup iluani suliagut aallutiinnassagigut, aammalu sulisut takornarianik sullissilluarnerpaat sulisorissagigut. Tassami imaakkami, takornariat akilersimasaminnik sullinneqartariaqarput, takornariartitsivimmi, Blue Icemi piginneqataasoq, Jacky Simoud naggasiivoq.
AAMMA ATUARUK Naalakkersuisut takornarianik amerlanerusunik takunissartik qilanaaraat