GE: Ilinniartitaanerup qaffasissuunnginnera inuiaqatigiinni ajornartorsiutit annersaraat

Sulisitsisut Peqatigiiffiat, Grønlands Erhverv, GE, Aningaasaqarnermut Siunnersuisoqatigiit ukiumoortumik nalunaarusiaminnik ippassaq pingasunngornermi saqqummiussereersullu taama oqarput.

Nunatsinni aningaasarsiornerulertoqalerpoq imaanngilarli aningaasarsiorneq ataatsimut isigalugu qaffakkiartortoq. Aalisarnerup iluani aningaasarsiorluartoqarneranut taamaallaat takussutissaavoq. Aningaasaqarnermut Siunnersuisoqatigiit taama oqarput.

Naak Naalakkersuisut ilinniartitaanerup qaffassarneqarnissaanut atatillugu anguniakkatik, nappassinissamut siuariartornissamullu pilersaarummi taakkartoraluaraat, anguniakkat naammanngillat, Sulisitsisut Peqatigiiffiat GE taama isumaqarpoq.

Partiit assigiinngitsut siunnersuutaasa ilaat "misiliutaannartut" GE-mit nalilerneqarput, soorlu tuluttut oqaatsit danskisut ilinniarnermut sanilliullugu pingaartinneqarnerunissaannut siunnersuutit:

- Danskisut oqaatsit ilinniartitaanermut pingaaruteqassusaat eqqarsaatigalugu taama siunnersuuteqarneq piviusorsiortuunngilaq, assersuutigalugu ilinniartitsisussaaleqisoqarpoq, tamannalu eqqarsaatigalugu tuluttut oqaatsit danskisut oqaatsinut naleqqiullugit pingaarnerutinneqarnissaat piviusorsiortuunani, GE tusagassiuutinut nalunaarummi ilaatigut oqarpoq.