Tyrkiami politiit 9000-it suliunnaarallartinneqartut

Tyrkiami politiit 9000-init amerlanerusut atorfimminnit suliunnaarallartinneqarsimasut, tv-qarfissuup CNN-ip Tyrkiami immikkoortuata CNN Türkip ippassaq sisamanngornermi nalunaarutigaa.
Tyrkiami politiit, asseq toqqorsivimmit Assi © : Dietmar/Flickr Creative Commons
Allattoq Ritzau
apriilip 28-at 2017 07:45
Nutserisoq Mads Lynge

Politiit suliunnaarallartinneqartut Fethullah Gülenimut attuumassuteqartutut pasineqarput. Gülen Tyrkiap præsidentianik Recep Tayyip Erdoganimik siorna uppisitseriarsimasutut Erdoganimit pasineqarpoq.

Inuit allat 110-t missaat Gülenimik tapersersuisutut pasineqarlutik Tyrkiami oqartussanit ippassaq tigusarineqarput.

Inuit pasineqartut 3000-init amerlanerusut politiinit tigusarineqarnissaannut peqqussut saqqummiunneqareerpoq, 1100-niillu amerlanerusut ippassaq tigusarineqarlutik. Tyrkiami nutaarsiassaqartitsivik Anadolu taama allaaserisaqarpoq.

Inuit 47.000-it Tyrkiami politiinit qaammatit kingulliit qulingiluat ingerlaneranni tigusarineqareerput, Tyrkiami naalakkersuisunik siorna juulip ulluisa 15-ianni uppisitseriaraluartoqarnerata kingorna sukannersumik aqutsisoqalerpoq.