KNR TV live streaming atorlugu KNR tallimanngornermi 28. november peerngaammik aallakaatitsiniarpoq
Qinersinermi taasinerit tamarluinnarmik kisinneqareernerat tikillugu taamatullu qinersinerup inernerata tusarnissaata tungaanut nittartagarput aqqutigalugu aallakaatitsissaagut.
“Maani KNR-imi suleqatitta TV live streaming atorlugu aallakaatitsisarnissaasa siullermeernissaat qinersinermut atatilugu piareersarpaat”, taama KNR-ip pisortaa Søren Lennert Mortensen nalunaarpoq imatullu nangilluni: ”Uagut isumarput naapertorlugu kalaaleqatitta nunani allaniittut TV live streaming atorlugu politikikkut ukiup ingerlanerani pisartut pingaarnersaannut malinnaasinnaalernerat ajunngilluinnartutut isigisariaqarpoq. Kisiannili aamma Kalaallit-Nunaanni politikimik namminerlu nunamik soqutigisaqartut eqqarsaatigaagut.”
TV live streaming siunissami atorneqalissaaq. Nittartakkatsinni aalajangersimasumik tamanna atortalissavarput, aammalumi radiokkut aallakaatitat TV-kullu sarsuatittakkat amerlanerusut taamatut aallakaatittalersinnaanissaat naatsorsuutigaarput.
Piffissap ingerlanerani radiokkut tv-kullu aallakaatitat tusarusutat takorusutallu attataasamik toorsinikkut pissarsiarineqarsinnaalissapput, taamaasillunilu inuit ulapaartuusut piffissaqaleraangamik KNR tusarnaartarsinnaalissavaat imaluunniit isiginnaarlugu, taamatut Søren Lennert Mortensen oqarpoq nangillunilu: ”Kiffartuussineq immikkuullarissoq imalunniit periarfissaq pitsaasoq tassaalersinnaavoq aallakaatitanik tusarnaarnermi isiginnaarnermiluunnit unilaartarnissamut aqqutsissiuunneqarneq imaluunniit isiginnaakkamik tusarnaakkamiluunniit utimoortitsisinnaaneq. Taamatut periarfissaqalerneq ilaqutarinnut ulapaartuusunut ajunngilluinnartumik aaqqiineruvoq.”
Neriussaagut TV live streaming-ip atortorissaarutai tallimanngorpat ingerlalluarumaartut, tassanilumi Tele Greenland ikiuulluartussaavoq. Isiginnaartartugut tusarnaartartugullu tamaasa qinersinerup unnukkuanik nuannersumik kissaappagut !
Paasisaqarnerorusukkaanni TV-mi pisortaq Jan Berg jbe@knr.gl imaluunnit pisortaq Søren Lennert Mortensen oqarasuaat 36 15 00 attavigineqarsinnaapput.
