Oqaat piinnarlugit: Tuttut 20.000-it Sibiriami toqorarneqartut

Ruslandip kangisissortaani tuttut 20.000-it unioqqutitsilluni piniarneqarsimapput. Tuttut oqai pillugit piniarneqartut, aviisi The Siberian Times allappoq.
Assi © : Alf Sollund/Flickr Creative Commons
apriilip 18-at 2017 10:26
Nutserisoq Sara K. Jakobsen

Unioqqutitsilluni piniarneq Ruslandip kangisissortaani Krasnoyarskimi pisoq, naalagaaffiup piniarnermik nakkutilliisuanit nunamilu eqqissisimatitameersunit pinngortitaq pillugu nunarsuaq tamakkerlugu suliniaqatigiiffimmit, Verdensnaturfondenimit, taperserneqartumit misissuiffigineqarpoq.

Nakkutilliisut naapertorlugit tuttut soqqusaatsuliorfigineqarlutillu misigittaatsumik toqunneqarsimapput. Ilaatigut tuttut 300-t missaanniittut pikkaluartat orpippassuarni toquinnarsimasut kingorna nassaarineqarput.

Tuttut 20.000-it missaanniittut sumiiffinni 800-ni assigiinngitsuni, 1.500 kilometerisut isorartutigisumi, toqunneqarput.

- Aalajangersimasumik piumasaqarlutik tuttunik toqutsisimasoraakka, tassalu tuttup oqaa piinnarlugu, nunami eqqissisimatitsinissamik suliaqartoq, Pavel Kockarev, The Siberian Timesimut oqarpoq.

Tuttup oqai nassuilu Kangiani, assersuutigalugu Kinami, inatsisit unioqqutillugit niuerfinni tuniniarneqartarput. Kangiamiut nakorsaatinut akuleruttarpaat.

Taimyrimi tuttoqatigiiaat nunarsuarmi amerlanerpaapput. Tamaani tuttut ukioq 2000-imi 1 millionit missaanniissimariarlutik ullumikkut 400.000-it 500.000-illu akornanniilersimassangatinneqarput.