Tusagassiuuteqarneq inatsisartuni

oktobarip 05-at 2004 07:58

Naalagaaffeqatigiinnitsinni kisiartaalluta nunatsinni oqaatsit marluk atorlugit tusagassiortariaqartarnitta nalilersonissaa pisariaqalerpoq, taama isumaqarpoq inatsisartuni ilaasortaq Per Rosing Petersen (S).

Per Rosing Petersen inatsisartuni ullumi oqaluuserissassanngortitsivoq tusagassiorfinni ileqqorissaarnissamut apeqquteqaamminut atatillugu tusagassiorfinni kalaallisuinnaq tusagassiortalernissap nalilersornissaa isumaqarfigalugu. Kalaalinngorsaanermut atatillugu tusagassiorneq aamma kalaalinngorsartariaqartoq Per Rosing Petersen oqarpoq, Danmarki, Savalimmiut nunarpullu eqqarsaatigissagaanni, manna tikillugu uagut kisiartaasugut, naalagaaffeqatigiinnerup iluani taamannak pisariusorujussuarmik suna tamaat marloqiusamik ingerlallugu. Assersuutigiinnarlugu Qanoruumi ukiuni kingullerni ataatigut qallunaatut  allagartalersuisalernissaq sakkortoorujorujussuarmik qisuariartoqarpoq.

- Tusagassioriaatsit isiginnaartariaappata, atuartariaappata tusarnaartariaappataluunniit tamatigut qallunaatut kalallisullu tusagassiortoqartariaqartoq, tamannalu nalilersortariaqartutut misigisimagama agguataarineq toqqammavigineqassappat. Kalaalinngorsaasoqassappallu, qallunaallu oqaatigineqartartutut nunatsinniittut ikiliartuinnaramik, nunatsinniittullu periarfissanik tugassiornermik ulikkaareermata, soorlu internetikkut, misigisimavunga nalilersuisoqartariaqartoq, Rosing Petersen oqarpoq.  

Per Rosing Petersen aamma isumaqarpoq nunatta avataaniit nunatsinnut suliartortunik kalaallit oqaasiinik ilinniaqqusisaraluarneq, marluinnik oqaaseqarnerput taamaattussaannartut isigilersimagatsigu qatangiinnartartoq.

Kultureqarnermut Naalakkersuisoq Henriette Rasmussenni isumaqarpoq innuttaasut ilaat kalaallisut oqaaseqartuunngitsut maani nunami pisunik paasissutissinneqartarunnaassappata tamanna isumaliornartoqartoq.