Tusagassiuut: USA-p Pituffik pillugu akerleriinnermi Danmark itigartippaa

Pituffimmi sullissinissamut isumaqatigiissutip nutaap USA-mit atorunnaarsinneqarnissaanut Danmarkip nunanut allanut tunngasunut ministeriata Martin Lidegaardip USA-mut noqqaassutaa USA-mit itigartinneqarsimavoq.
Allattoq Ritzau
februaarip 27-at 2015 17:07

Pituffimmi sullissinissamut atatillugu suliaq inatsisinut tunngassuteqarpoq, politikkimut tunnganani. USA-p Danmarkimi aallartitaqarfiata nittartakkamut Finans.dk-mut tamanna erseqqissaassutigeqqippaa.

Pituffimmi sullissinissamut suliariumannittussarsiuussinerup USA-mit atorunnaarsinneqarnissaa, Martin Lidegaardip USA-mi tikeraarnermini ippassaq noqqaassutigaa.

- Pituffimmi aserfallatsaaliuinermik isumaqatigiissutip eqquutsinniarnerani ajornartorsiuteqassappat amerikamiut eqqartuussisutigoortumik oqartussaasa aaqqinniartussaavaat, taama Gavin Sundwall, Københavnimi amerikamiut aallartitaqarfiannit oqaaseqartartoq, oqarpoq.

2,4 milliardit koruuninik nalilik

Pituffimmi kiffartuussinissaq Exelis Services A/S-imut, amerikamiut suliffeqarfiutaannit Vectrusimit pigineqartumut, suliassanngortinneqarpoq.

1950'ikkunniilli isumaqatigiissutit malillugit kiffartuussinissaq qallunaat kalaallilluunniit suliffeqarfiannit isumagineqartussaavoq.

Aamma atuaruk Lidegaardip USA peqquaa Pituffiup kiffartuunneqarnissaanik isumaqatigiissut unitseqqullugu

Isumaqatigiissut katillugu 2,4 milliardit koruuninik naleqartoq septembarip naaneranit ukiut arfineq marluk atuuttussaavoq.

Nunanut allanut tunngasunut ministerip Martin Lidegaardip amerikamiut Danmarkimut aallartitaat, Rufus Gifford, ataatsimeeqatiginerani suliariumannittussarsiorneq kinguatseqqullugu piumaffigaa. Amerikamiut sakkutuui timmisartortartut suliariumannittussarsiorneq isumagivaat.

Pisortatigoortumik oqaaseqassapput

Finansip paasissutissaatai naapertorlugit amerikamiut illersornissamut ministeriaqarfianit aallartitat danskit amerikamut aallartitaat Washingtonimi USAmi ullumi naapippaat.

Tamatuma kingorna amerikamiut sakkutuui timmisartortartut, suliarinnittussarsiornermut isumaginnittut, isumaqatigiissut pillugu pisortatigoortumik oqaaseqassapput.

Aamma atuaruk Suliariumannittussarsiuussinermut malittarisassat nutaat Namminersorlutik Oqartussat akuerisimavaat

Exelis Servicep suliariumannittussarsiuussinermi inatsisit malikkai taamaalillunilu isumaqatigiissummit peersinneqarsinnaanngitsoq USA-p ataatsimiinnermi naqissusissagaa ilimagineqarpoq.

Piffissap ingerlanerani Danamrkimi suliffeqarfinngoriartuaassaaq

Amerikamiut suliffeqarfiutaata oqaaseqartartuata Kim Rubergip Exelis Services ilumut Danmarkimi suliffeqarfiusoq oqaatigaa.

- Suliarinnittussarsiortunut suliariumannikkumagaanni Danmarkimi suliffimmik pilersitsisarput. Aatsaallu suliarinnittussatut toqqagaagaanni suliffik iluamik aallartittarlugu. Danmarkimi suliffeqarfiit nunanut allanut suliariumannikkaangamik aamma taamak iliortarput.

- Annikitsumik aallarteriarluni, immaqa allatseqarfittut, taamaattumillu mikisunnguamik allaffeqarluni suliffippassuit allat peqatigalugit, Kim ruberg oqarpoq.

    /ritzau/