Tusagassiuut: Royal Arctic Line soraarsitsiortoqqilersoq
Hammekenip nittartakkamut oqaatigaa 'allanik soraarsitsisoqannginnissaanik oqaraluaruma, assigiinnassavaa sulisut salloqittarlugit’.
Soraarsitsinerilli aappaagu pissanngitsut Hammekenip oqaatigaa. Soraarsitsinerillu umiarsuaatileqatigiiffiup Nunatsinni suliffeqarfiini immaqa pissanngitsut aamma erseqqissaatigaa. Sulisullu 'suliaqarfinnut allanut' nuunneqarsinnaasut aamma periarfissaasoq Shippingwatch.dk-mut ilanngullugu oqaatigaa.
Aamma atuaruk RAL-ip millionerpassuarnik sipaarutini saqqummiukkai
RAL-ip ukioq manna ukiup affaani siullermi 11 millionit koruuninik sinneqartooruteqarluni qanittukkut nalunaarutigaa. Umiarsuarnilli nutaanik pisiortorneq Nuummilu taliffarfittaassami Sikukimi taleqqanermut ukiumoortumik 40 millionit koruuninik akiliuteqartarnissaq akisuvoq. Taamaammat umiarsuaatileqatigiiffik sipaarniartariaqarpoq.
RAL Islandimiut umiarsuaatileqatigiiffiat Eimskip peqatigalugu ingerlatseqatigiiffimmik pilersitsiniarpoq, ingerlatseqatigiiffittaassallu umiarsuaatai Nunatta, Islandip Europallu akornanni angalasassapput.
Sulisut qassit soraarsitaarartarsinnaanersut RAL-ip pisortaanerata oqaaseqarfigerusunngilaa.