Tusagassiuisarnermi aalajangersaasartunut maalaarut
Naalakkersuisunut ilaasortap Johan Lund Olsen-ip septembarip qaammataani Royal Greenland-ip pisortaanerata Keld Askær-ip soraarsinneqarnissaanik oqarsimanerarneqarnera tusagassiuinermi aalajangersaasartunut suliakkiutigineqarpoq.
Tusagassiuisarnermi Aalajangersaasarfik maalaartarfiuvoq arlaannaannulluunniit qilersorsimanngitsoq, tusagassiuutinit, tusagassiortunit innuttaaasullu sinniisuinik ilaasortaqarluni. Taakku inatsisilerituumik nunatta eqqartuussivianeersumik siulittaasoqarput. Aalajangiisarfiup suliassaraa isummerfigissallugu tusagassiuutit ileqqorissaarnissamik malittarisassanik unioqqutitsisimanersut, soorlu eqqunngitsumik tusagassiornermikkut.
Tassalu eqqunngitsumik issuarneqarnini Johan Lund naammagittaalliuutigaa. Naammagittaalliumminut ilanngullugu oqaatigaa allaaserisaq naqinneqartinnagu issuarneqarnermi eqqunngitsuunera aviisimut erseqqissaatigisimagaluarlugu.
Soraarsitsinissamilli Johan Lund Olsenip oqarnera allanit aamma tusaaneqarsimavoq, tassami nutaarsiassaqartitsiviup Ritzauip ilanngutassiortua taamani islandimeeqataasoq tusaasunut ilaavoq.
Pisimasoq isummerfigissallugu ajornanngippasikkaluartoq aalajangiisartut isummerfigiuminaatsissagaat tusagassiornermi inatsisileritooq Oluf Jørgens isumaqarpoq.
- Tusagassiuutini aalajangersaasartuni suliaq ajornakusuussaaq, pissutigalugu Johan Lund Olsen-ip oqarsimanerarneqarnera eqqornersoq eqqunnginnersorluunniit nalunarmat, uppernarsaatissanimmi aalajangersaasartut peqanngillat, tamannaavorlu ajornartorsiutaasussaq. Ole Jørgensen nassuiaavoq.
Taamaattumik suliassaq eqqartuussivimmi sulirissallugu naleqqunnerussasoq Oluf Jørgensen isumaqarpoq.
- Suliassaq inatsisitigut suliakkiutigissallugu periarfissaqarpoq, eqqartuussivillu aamma periarfissaqarpoq uppernarsassallugu nassuiaanertalimmik suliap ingerlanneqarnissaa, tamannali Johan Lund Olsen-ip kisimi naliligassaraa atorusunnerlugu atorusunnginnerluguluunniit. Ole Jørgensen nassuiaavoq.
Sermitsiami tusagassiortoq oqaloqatigiinnermi nalaani malugisimaarsimasoq Johan Lund Olsenip ilanngullugu tikkuarpaa, apeqqullu taanna aamma eqqartuussivimmi suliassaqqinnerusoq Oluf Jørgensen isumaqarpoq.
