Tusagassiuinermi sulisut peqatigiiffiata KNR isornartorsioraa

KNR-ip tv-kkut aallakaatitassiamini pulaartimi Nunatta aningaasaqarneranut tunngasunik illuatungeqarani pineqartullu akissuteqarnissaannut periarfissinnagit, kiisalu aamma aallakaatitami pineqartumi oqaatigisaminut uppernarsaatissaqarani oqaaseqartinneqarnera Tusagassiuinermi Sulisut Peqatigiiffiata (TP) isornartutut isigaa. 

AAMMA ATUARUK KNR-ip aallakaatitassiaa sakkortuumik isornartorsiorneqartoq

KNR-TV-ip aallakaatitassiamik Mudi TV-mik aallakaatitsinerata kingorna qaammat ataaseq qaangiuttoq TP taama isornartorsiuivoq. Aallakaatitami pulaartup oqaluttuaraa Google Nunatsinnut ukiut 15-it matuma siorna saaffiginnissuteqarsimasoq Kujataani datacenteriliornissamik kissaateqarluni, Googleli itigartinneqarsimanerarpaa Googlep Nunatsinnik atornerluinissaa annilaangassutigineqarmat.

Taava pulaartup oqaatigaa Google taamani akuerineqarsimasuupput Nunarput ullumikkut 100-500 milliardit koruuninik kaaviiaartitaqassagaluartoq. Aallakaatitap ingerlanerani taamaattoqarneranut uppernarsaatissanik saqqummiussisoqanngilaq, tamannalu peqatigiiffiup isornartorsiorpaa.

- Aallakaatitaq Mudi TV, KNR-ip oktobarip aqqaneq-aappaani aallakaatitaa, innuttaasunik kiffartuussilluni tusagassiuutip pimoorussisup qanoq tusagassioriaaseqannginnissaanut assersuutissaalluarpoq. KNR-ip uppernassusianik innarliiginnarani aamma ilassortatta ullut tamaasa tusagassiaannut pitsaasunut akornutaaratarsinnaavoq, TP-mi siulersuisut taama allapput.

Tusagassiuut tunulliunneqartoq

Tusagassiuinermi Sulisut Peqatigiiffianit aamma oqaatigineqarpoq tusagassiornermi malitassat KNR-ip tv-mut immikkoortortaqarfianit qangaaniilli tunulliunneqarsimasut. Taamaattoqarneratigullu KNR-ip tusagassiornermi ileqqorissaarnissamik nammineq malittarisai unioqqutinneqarput:

- Tusagassiortutut ilinniarsimasumik aaqqissuisumik, tusagassiornermi ileqqorissaarnissamik malittarisassat malinneqarnissaannik qulakkeerinnittussamik, taamatuttaarlu KNR-ip aliikkutassianik aallakaatitassiaata tusagassiornikkut pitsaasuunissaannik tunuliaqusiisussamik atorfinitsitsisimannginnera Tusagassiuinermi Sulisut Peqatigiiffiannit paasiuminaatsipparput, tamannami innuttaasunik kiffartuussiviup tungaanit naatsorsuutigineqarnissaa pissusissamisoormat.

Nutaarsiassanut immikkoortortaqarfik tusagassiornermik suliaqarfiuvoq

KNR-imi tv-mi pisortap Kim Larsen oqaatigaa tusagassiornermik tv-kkut aallakaatitassiat tusagassiortunit nutaarsiassanut immikkoortortaqarfimmeersunit suliarineqartartut, aallakaatitassiallu tv-mut immikkoortortaqarfimmi suliarineqartartut immikkoortilluinnarneqartut.

- KNR TV-mi tusagassiornermik suliarineqartartut nutaarsiassanut immikkoortortaqarfiup aaqqissuisoqarfianit suliarineqartarput, soorlu nutaarsiassat, pisunik aallakaatitassiat oqallitsitsinerillu. Aliikkutassanik, kulturimik, timersornermik aallakaatitassiat, aallakaatitassianillu avataaneersunik pisiortorneq KNR TV-mi pisortaqatigiinnit aallakaatitassiornermik, aallakaatitassianik piareersaanermik tv-mullu aaqqissuisuunermik misilittagaqarluartunit isumagineqartarput, Kim Larsen taama oqarpoq.

KNR-ip pisortaanerata Sermitsiaq.AG-mut siusinnerusukkut nassuiaatigaa tv-kkut aallakaatitassiamut Mudi TV-mut, KNR-ikkut oktobarip aqqaneq-aappaani aallakaatinneqartumut atatillugu KNR-imi suleriaatsini kukkuneq pissutaasoq