AWG2016 Tusagassiortut 130-t Nuummukassapput
Tusagassiortoq amerikamiu Nuummut tikereersimasoq KNR-ip oqaloqatigaa, Inuillu pinnguaataat USA-mi soqutigineqarluartut taassuma oqaatigaa.
- Arctic Winter Games pillugu allaaserinnikkiartorpunga, uagummi amerikamiuusugut timersornikkut unamminerit nuannarilluartuuagut, taamaammat issittormiut timersuutaat suuneri, soorlu Inuit pinnguaataat, paasisaqarfiginerorusullutigit malinnaajartorpugut.
- Aamma naak Nuuk taama mikitigigaluartoq, inunnik taamak amerlatisigisunik qanoq ililluni katersuuffiusinnaanera paaserusoqaarput, USA-mi aallakaatitsiveqarfissuarmi National Public Radiomimi tusagassiortoq, Rebecca Hersher oqarpoq.
Tusagassiorfiit ilisimaneqarluartut malinnaalersut
Tusagassiortut nunanit tamalaaneersut sapaatip akunnera una Nuummut tikeralissapput.
TV-lkkut immiussisuussapput:
ZDF, tysk tv
TF1, fransk tv
NRK, norsk tv
CBC, canadisk tv
Al Jazeera, Qatar (engesk)
State TV, Rusland
Trans World Sport, USA
SVT, svensk TV
SUCH Tv, Pakistan
365 days of Sport, Online, Australien
Raadiokkut immiussiartortut aviisiliortullu:
National Public Radio, National Geographic, Monocle, National Geographic Traveller, Politiken, Martin Breum: Ud at Se, Idrætsliv Berlinske.
Tusagassiortut aviisiliortullu Nuummi malinnaajartortussat 130-t missaaniipput, nunanilu assigiinngitsunit aqqanilinnit aggersuullutik, ilaatigut USA-miit, Australiamiit Pakistanimiillu. Tusagassiorfiit ilisimaneqarluartut, National Geographic Al-Jazeeralu, malinnaatitaqartunut ilaapput.
Aamma atuaruk Unammiuaarnerit akeqanngitsumik malinnaaffigineqarsinnaassapput
Tusagassiortullu tikeraarneranni piffissaq atorluarneqassaaq, nunatsinnimi pissutsit allat aamma sammineqassapput.
- Allanik aamma sammisaqassapput, soorlu nunatsinni aalisarneq, silap allanngoriartornera, inuusuttut ilinniartitaanerat kinaassuserlu pillugit tusagassiortut ataatsimoorneranni saqqummiussissaagut. Taamasiornikkut nunatsinni pissutsit pillugit avammut saqqummiussissaagut, Visit Greenlandimi pisortaq Anders Stenbakken nassuiaavoq.
Aamma atuaruk AWG2016 qanoq eqqaamarusuppiuk
Tusagassiortoq amerikamiu Rebecca Hersher aamma allaqqinnaanik allaaserinnikkiartorpoq.
- Kalaallit Nunaanniitsillunga imminut toqunnissamut pinaveersaartitsineq pillugu immikkut angisuumik suliaqarpunga, soorlu Kalaallit Nunaat ajornartorsiummut immikkut annertuunik ukiorpassuarni suliniuteqartarnera. Uagut USA-p issittoqarfiani tamanna aamma ajornartorsiutigaarput, Rebecca Hersher oqarpoq nangillunilu:
- Taamaammat kalaallit nunaqqatigiillutik anguniagaqarlutik suliniuteqarniartarnerat uagut soqutiginartittorujussuuarput, Rebecca Hersher, oqarpoq.
AWG2016 arfininngorpat marsip tallimaanni siullermik tusagassiortorpassuarnik Hotel Hans Egedemi ullaakkut arfineq pingasunut katersuutsitsisassaaq, tassanilu ullaat tamaasa pilersaarusiukkanik assigiinngitsunik tusagassiortunut saqqummiisoqartarsalluni.
