Tusagassiorfiup Sermitsiaq.AG-p ukiumoortumik angusani naammaginartinngikkai
Angusat ulluinnarni aqutsisunit siulersuisunillu naammaginanngitsutut isumaqarfigineqarput. Taamaattorli Kalaallit Nunaanni tusagassiorfimmik kiffaanngissuseqartumik arlaannaannulluunniillu attuumassuteqarfimmik ingerlatsiniarnerup ajornakusoornerujussuanngorsimanera angusanit takutinneqartoq oqaatigineqarluni.
Tamtumunnga atatillugu aamma oqaatigineqarluni angusat inuiaqatigiinni aningaasarliornermit annertuumik sunnersimaneqartut, tamatumuunami ussassaarutinik nioqquteqarneq sunniivigineqarsimammat.
Angusanut pissutaaqataasut aamma tassaapput unammilleqatigiinnerup annerulersimanerata kinguneranik aviisit aaqqissuisoqarnikkut imarisanut suli aningaasaliissuteqarnerat aamma aviisit misissuerpalaartumik tusagassioriaatsimut Kalaallit Nunaanni inuinnaat naalakkersueqataanerannut pingaaruteqartumut aningaasaliissuteqarnerat. Aningaasaqarneq tatineqaraluartoq nunami maani Issittumilu nunat tamalaat akornanni tusagassiornerup ineriartortinneqarneranik ingerlatiinnassavarput, akisussasut allapput.
2014-imi angusat ajorseriarnerannut pingaarutilimmik pissutaasoq tassaavoq, Namminersorlutik Oqartussat aviisinut nuna tamakkerlugu saqqummersartunut tapiissutinik ilimaginngilluinnakkamik atorunnaarsitsinerat, naak tapiissutit 2014-imut aningaasanut inatsimmi akuersissutigineqarsimasumi allassimagaluartut.
AAMMA ATUARUK Aleqap aviisinut tapiissutit qularnartumik tunngaveqarluni atorunnaarsippai
AAMMA ATUARUK Sermitsiaq AG-p tapiiffigineqannginnissaa Aleqap aalajangiusimavaa
- Sermitsiaq.AG-p iliuuserineqartoq tamanna siunniussanut inatsisillu oqaasertaanut naapertuutinngitsutut, taamaalillunilu politikkikkut amerlanerussuteqartunut, tapiissutinik akuersissutiginissimasunut, aamma naapertuutinngitsutut isumaqarfigaa, tusagassiuutinut nalunaarummi allapput.
Nuuk Lokalreklame, Nuuk Ugeavisimik saqqumersitsisartoq, pingaartumik inuiaqatigiit aningaasaqarneranni pitsaanngitsumik ineriartorneq tunngavigalugu annertuumik kinguariaateqarsimavoq.
Nuuk Lokalereklamemi ilanngaatissat akileraarutit peereerlugit angusat 135.000 koruuniupput ukiup siuliani 605.000 koruuninik sinneqartooruteqarsimagaluarluni.
