Randi Vestergaard: Tusagaq ajuusaarnartorujussuuvoq
Ingerlatseqatigiiffiup True North Gems Greenlandip akiliisinnaajunnaarnini ataasinngormat nalunaarutigaa.
Aappaluttumi rubinisiorfik True North Gemsip ingerlatarigaluarpaa, ingerlateqqinneqarnissaanulli aningaasaleerusuttunik nassaartoqarsinnaasimanngilaq, suliffeqarfiullu akiliisinnaajunaartutut nalunaarutigeqarnissaa ingerlatseqatigiiffiup siulersuisuisa aalajangerpaat.
Taamatullu aalajangertoqarnera Randi Vestergaard Evaldsenip ajuusaarutigaa:
- Siullermik oqaatigissavara tusagaq ajuusaarnartorujussuusoq, nuanniillunilu. Naalakkersuisuninngaanniit isumalluarfigisimagatsigu, aammalu aatsitassarsiornerup iluamik aamma assigiinngitsunik suliaqarnissap iluani pilersaaruteqaraluaratta.
Aamma atuaruk TNGG 100 millionit koruuninik amigaateqarluni akiliisinnaajunnaartoq
Nunatsinni aatsitassarsioqatigiiffiit aningaasalersuisussanik pissarsiniarnermikkut aatsaat ajornartorsiulinngillat. Randi Vestergaard Evaldsenillu oqaatigaa inatsisiliornikkut allanngortittariaqartoqarnersoq maanna misissorneqaleruttortoq.
- Matumani pisoq tunngavigalugu allannguuteqartitsisoqassanersoq neriorsuutigisinnaanngilara, inatsiliornerli maanna misissorparput, naalakkersuisoq oqarpoq.
Suliniutissanillu nutaanik maannakkorpiaq neriorsuisinnaannginnerarpoq.
- Saqqummiussassaqalerutta nalunaarutigiumaarpagut, naalakkersuisoq taama oqarpoq.
TNGG ataasinngormat akiliisinnaajunnaarpoq, aatsitassarsiornermillu sulinit Aappaluttoq maanna uninngatikkallarneqarpoq. Randi Vestergaard Evaldsenili innuttaasut sinneri assingalugit neriuuteqarpoq.
Aappaluttumi rubinisiorfiup ingerlaannarnissaa pillugu aningaasaliisinnaasunik nutaanik nassaarniartoqassasoq, Norgemiut suliffeqarfiutaata LNS-ip, Namminersorlutillu Oqartussat ingerlatseqatigiiffiutaata Greenland Venturep, True North Gems Greenlandimi piginneqataasut akiliisinnaajunnaarnerup nalunaarutigineqarnerata kingorna oqaatigaat.
Aamma atuaruk Rubisiorfiup ingerlaannarnissaa qulakkeerusupparput
