Tunumi aalisakkanik tunisassiorfituaasoq matuneqarpoq
Saarulliit tunisassiorfiup qerititsivianiittut imaanut iginneqarput ammassaallu qimminut nerisassanngorlugit fabrikkip silataanut inissinneqarput, tamannalu pivoq kommune isumasioreerlugu.
- Tunisassiorfimmut tunineqartut kingulliit annerusumik saarulliit septemberimi tunineqarput, taakkualu maannakkut imaanut iginneqarput tunisassiorfillu matoqqavoq. Nunaqarfimmi aqutsisut siulittaasuat Boas Boassen taama oqarpoq.
Ammassat 12 tonsit qimminut nerisassatut neqitassatullu tigoriaannanngorlugit fabrikkip silataanut inissinneqarput.
Aalisakkanik tunisassiorfik Kuummiuniittoq suliffeqarfimmit Qaqortumi angerlarsimaffeqartumit Arctic Prime Produktionemit ingerlanneqarpoq.
- Saarulliit tunineqartartut ikiliartorput assigisaannillu umiatsiaararsortut tunisassiorfimmut tunisisartut ikiliartorlutik, suliffeqarfimmi Arctic Prime Produktionimi pisortaq Heinza Petersen oqarpoq.
Kuummiuni nunaqarfimmi aqutsisut siulittaasuat tunisassiorfimmi ingerlatsisut pisortaanit ilisimatinneqarpoq tunisassiorfik imminut akilersinnaasumik ingerlanneqarsinnaanngitsoq.
Arctic Prime Produktionemi pisortaq, Heinza Petersen, nunaqarfimmi aqutsisut siulittaasuannut Boas Boassenimut oqarpoq:
- Tunisassiorfimmut tunineqartartut ikippallaartut aningaasartuutinut sanilliullugit soorlu imermut aamma kallerup inneranut akiliutigineqartartunut sanilliullugit, fabrikkillu imminut akilersorniarneqarnera ajornakusoortuusoq, Boas Boassen oqarpoq.
Tunisassiorfik ammaqqissanersoq maannakkut oqaatigineqarsinnaanngitsoq pisortaq oqarpoq tunisassiorfiup piffissami kingullermi ingerlanneqarnera nalilersorneqassammat.
Kuummiuni tunisassiorfiup matuneqarneratigut piniartut aamma aalisartut tunisassiarisinnaasatuaat tassaavoq puisit amiinik tunisineq.
Tunisassiorfiup matuneqarnera pillugu Kuummiuni Sermiligaamilu nunaqarfinni aqutsisut aqagu ataatsimiinneranni oqaluuserissavaat.
Kuummiuni tassalu tunumi aalisakkanik tunisassiorfituaasup matuneqarnera pillugu Kommuneqarfik Sermersuumi inuussutissarsiutitigut siunnersuisoqatigiit ilisimatinneqassapput.
