Siulittaasoq Tunngaviusumik isummavut suli sorsuutigaavut

Partii Inuit aamma Partii Naleqqap kattutsinnissaanik isuma partiip mikisup maanna siulittaasoriunnaagaata Per Rosing Petersenip nammineq isumassarsiaraa.

Partiimi ilaasortat allat isummat partiimik tunngaviliisuusut illersorusuppaat.

Taamaammallu siulittaasuujunnaartoq partiimi ilaasortaajunnaarpoq.

Partii Inuinni, Inatsisartuni ilaasortaatitaqarunnaartumi, siulittaasuugallartoq, Paaliit Mølgaard taama naliliivoq.

- Una erseqqissaatigissavara, Per Rosing Petersenip namminiivilluni una kattunnissamik isuma saqqummiummagu. Uagut tassunga tunngasumik siornatigut eqqartugaqarnikuunngilagut. Aamma tamatumunnga suliaqanngilagut, partiimi siulittaasuugallartoq oqarpoq,

Taanna aamma oqaluttuarpoq, kattunnissamik isuma aalajangiiffiginiarlugu immikkut ittumik ataatsimeersuartariaqarnerlutik isumaqatigiinngissutaasimasoq.

Per Rosing Petersen isumaqataalu taamaaliorusunngillat. Ataatsimiinnissarsuarmut aningaasanik atuerusunngillat, siunnersuutigaallu ilaasortat Partii Naleqqamut ilaasortanngussasut.

- Tamannalu uagut kisaatiginngilarput. Aamma partiiugatta nammineq immikkut isummertaaseqartut, taanna illersorusullugu aamma nammineq uagut sulerusukkatta. Taanna tunngavigalugu uagut uninngavugut, aamma taamatut nuuginnassanngilagut, Paaliit Mølgaard oqaluttuarpoq nangillunilu:

- Avissaartuunertut taaneqarsinnaanngilaq, nammineq taanna isuma pigigunikku.