Tunngaviusumik inatsisissatut siunnersuut isumaqatigiinngissutaasoq
Tunngaviusumik inatsisissamut isumalioqatigiissitap tunngaviusumik inatsisissamik nunatta namminiilivinnerani atuutilertussamik siunnersuusiornissaanik inatsisinut ataatsimiititaliap kaammattuutaa Naalakkersuisunit malinneqarnissaa isumalioqatigiissitap siulittaasuata kissaatigisimagaluarpaa
Taanna Sermitsiamut tallimanngornerm oqarpoq, Inatsisartut ataatsimiittarfianni aalajangigaq atuuttuusoq, Naalakkersuisullu tamanna allanngortissinnaangikkaat.
Naalakkersuisulli piumasaminnik suliakkiisinnaasut miserratiginngilaa.
AAMMA ATUARUK Tunngaviusumik inatsisissamut isumalioqatigiissitaq ulapittussaassasoq
- Naalakkersuisut taamaaliornissaminnut piginnaatitaaffeqaraluarput, kisianni aamma ima oqarusunnarpoq, allannguineq taama annertutigippat, aamma akuutitsineq annertunerusoq naalakkersuisuninngaanniit ingerlanneqarsinnaasoq. Tamannalu orniginarnerusoq, suliaq tamanit akuerineqarsinnaasumik ingerlassappat, Vivian Motzfeldt oqarpoq.
Naalakkersuisut tunngaviusumik inatsisissamut missingersuinerminni nunarput namminiilivippat atuuttussamik tunngaviusumik inatsisissamik siunnersuusiornissamik suliakkiinissaannut Inatsisartut inatsisinut ataatsimiititaliaat kaammattuuteqarpoq. Naalakkersuisullu kaammattuutigineqartumut tusarnaarsimasariaqaraluaraat, Vivian Motzfeldt isumaqarpoq.
Motzfeldtip marloqiusumik immikkoortortalik isumassaqartinngilaa
Naalakkersuisulli kaammattuutigineqartoq malinngilaat. Isumalioqatigiissitaq tunngaviusumik inatsisissamut marlunnik immikkoortortalimmik piffissani marlunni atuuttussamik, tassalu ataaseq danskit tunngaviusumik inatsisaata ataani atuuttussamik allalu nunarput namminiilivippat atuutilertussamik siunnersuuteqassasoq, inatsisissamut isumalioqatigiissitamut suliakkiissutinut najoqqutassiami allaqqavoq.
Tamannalu Vivian Motfeldtip isumassaqartinngilaa:
- Marloqiusamik sanasoqassappat, naalagaaffillu annertoorujussuarmik ilanngtitillugu suliaqarnermi, taava ukiut taakku taaneqartut sivikippallaarujussuartutut isigaakka. Misilittakkammi takutippaat naalagaaffimmik attavigisamik akuutitsilluni tunngaviusumik inatsisiliorniarnerup aporfissarpassuit assigiinngitsut appakaatittarai. Taamaalillunilu piffissamik sivitsorsaaterujussuanngortarluni.
AAMMA ATUARUK Tunngaviusumik inatsit Danmarkip tunngaviusumik inatsisaata ataaniissaanngilaq
Tamatuma saniatigut, danskit naalagaaffiata ataani atuuttussamik tunngaviusumik inatsisissamut siunnersuutissap ukiunik marlunnik pingasunilluunniit suliarineqarnissaa ajornakusoorsinnaasoq, Vivian Motzfeldt isumaqarpoq. Tamanna Ilisimatusarfimmi piffinni kingulliunerusumi oqaluttuarisaanermut adjuntip, Jens Wendel-Hansenip isumaqatigaa.
- Namminersulerusukkutta namminneerluta tunngaviusumik inatsiseqassaagut. Kisianni namminersulivikkusunngikkutta naalagaaffiup ataani naalagaaffimmut naleqqussakkamik inatsit naluara sumut iluaqutaassanersoq, tunngaviusumik inatsisissamut isumalioqatigiissitami siulittaasoq, Vivian Motfeldt taama oqarpoq.
Namminersulivinnissamut naalakkersuisoq, Suka K. Frederiksen, Qanoroomi unnugu apeqqutinut akissuteqasaaq.
