Tunngaviusumik inatsisissatut siunnersuut akuersaarneqanngitsoq

Tunngaviusumik inatsisitaarnissaq unitsikallarneqarsinnaavoq, Lagtingip pisortaanera naliliivoq, siunnersuut inatsisartut malittarisassaanut naapertuutinngimmat.

- Lagtingimi malittarisassat naapertorlugit, inatsisissatut siunnersuutit tamarmik immikkuullarissunik oqaasertalersukkanik ilanngussaqartussaasut, Savalimmiuni parlamentimi pisortaaneq Jonhard Klettheyggj oqarpoq.

Inatsisissatut siunnersuutit Aqutsinissamut Inatsimmut Landstingillu malittarisassaanut naapertuunnersut
Lagtingimi allaffisornikkut suliallit nakkutigisussaavaat.

Immikkut oqaasertalersuisoqarsimannginnera tupigusuutigineqartoq

Savalimmiunimi tunngaviusumik inatsisissatut siunnersuummi paragrafini 57-iusuni marluinnaat oqaasertalersorneqarsimapput, tamannalu mianersortoqartariaqarneranut tunngaviliivoq.

 - Taamaammat Lagtingip siulittaasoqarfianut innersuussissaagut siunnersuut peerneqassassoq, tassalu taamaasiorpugut. Oqaasertalersuinerillu pingaaruteqarluinnartut, pisortaaneq oqarpoq:

- Oqaasertalersuisoqarsimanngippat paragrafit ataasiakkaat qanoq isummersorfigissallugit ajornakusoorpoq,

Jonhard Klettheyggj oqarpoq.

Suli akuersissutigineqarsinnaasoq

Siulittaasoqarfiup tunngaviusumik inatsisissatut siunnersuutip akuerineqannginnissaanut innersuummut isumaqataagaluarunilluunniit, Lagtingi aalajangiisussaavoq.

- Inatsisissatut siunnersuut marlunngorpat siullermeerlutik suliarissavaat, siunnersuullu peerneqassanersoq imaluunniit Lagtingimi suliarineqassanersoq taasissutigissallugu, oqaasertalersorneqanngitsunik inatsisissatut siunnersuusiorneq nalinginnaasuunngitsoq, Lagtingimi pisortaaneq erseqqissaavoq.