Tunngaviusumik Inatsisissaq pillugu isumalioqatigiissitaq aallarteqqilertoq

Partii Naleqqap septemberimi 2018-imi Naalakkersuisoqatigiinnit aninera Naalakkersuisut ikinnerussuteqarlutik Demokraatinit ikorfartorteqarlutik ingerlaqqilernerat suliamut sivitsorsaataasimasoq, naalakkersuisoq nassuiaavoq.

Taamaammat Naalakkersuisoqatigiit Tunngaviusumik Inatsisissaq pillugu Isumalioqatigiissitap suliassaata nassuiarneqarnera tulluarsartariaqarsimagaat Vittus Qujaukitsoq oqarpoq.

- Ikinnerussuteqarluta naalakkersuisunngornitsinni Inatsisartuni tapersersortit aamma peqatigalugit suliaq taanna ingerlattussaanikuugatsigu maannakkumut piffissaq annertooq tassani nalimmassaanermut atornikuuvoq, Vittus Qujaukitsoq oqarpoq.

Tunngaviusumik Inatsisissaq pillugu Isumalioqatigiissitaq aallarteqqinneqassasoq, Naalakkersuisut marsip 22-ani ataatsimiikkamik aalajangerpaat.

Isumalioqatigiissitami kikkut ilaasortaanissaannik Inatsisartuni partiit maanna inassuteqaateqassasut, Aningaasaqarnermut Naalakkersuisoq KNR-imut oqarpoq. 
Isumalioqatigiissitalli suut suliarissanerai maanna oqaatigiumanagit.
Isumalioqatigiissitalli suliassaata tunngavissartaa inatsisartuni partiinut nassiutereersimavaa:

- Immikkuualuttortai taakku Inatsisartut inassuteqareernerisa kingorna saqqummiussinnaalissuagut, Vittus Qujaukitsoq KNR-imut taama oqarpoq. taassuma naatsorsuutigaa Isumalioqatigiissitap ilaasortassai kikkuussanersut tallimanngorpat aalajanersinnaassallugu, taamaalillutik sapaatit akunnerata tulliani sulinertik aallartissinnaanngussammassuk.

Isumalioqatigiissitaq aningaasanut inatsit malillugu 5.6 milliuunit koruuninik immikkoortitsiffigineqarnikuuvoq.