Tunngaviusumik inatsisissamut isumalioqatigiissitap sulinera aallartippoq

Kalaallit Nunaata Tunngaviusumik inatsissaanik sulineq pisortatigoortumik tallimanngornermi aallartippoq.
Assi © : KNR
maajip 19-at 2017 12:21

Kalaallit Nunaata tunngaviusumik inatsisissaanik sulineq pisortatigoortumik aallartippoq.

Taama KNR-imut nalunaaruteqarpoq, Tunngaviusumik Inatsisissaq pillugu Isumalioqatigiissitami ilaasortaq Nivi Olsen Demokraatineersoq.

Isumalioqatigiissitap ataatsimiinera siulleq tallimanngornermi ullup qeqqata siorna qulinut aallartippoq.

Isumalioqatigiissitaliami siulittaasuuvoq Vivian Motzfeldt (S) , sinneri tassaapput , Ane Hansen (IA ) Jess Svane (S) Mimi Karlsen (IA), Per Rosing-Petersen (PN) aamma Mala Høy Kúko (A).

Isumalioqatigissitap ataatsimiinnissaa sioqqullugu, tunngaviusumik inatsit qanoq ittoq siunnersuutigineqassanersoq nalornissutigineqarpoq.

Isumalioqatigiissitap sulinissaannut najoqqutassaanik, Naalakkersuisut allakkaminni allapput , tunngaviusumik inatsisissaq immikkoortunut marlunnut suliarineqassaasoq, aappaa danskit tunngaviusumik inatsisaata ataani atuuttussaq aappaalu Kalaallit Nunaat namminersulivippat atuuttussaq.

Tamannali isumalioqatigiissitap siulittaasuata akuerinngila, taannami oqarpoq, tunngavisumik inatsit atuutilerumaartoq Kalaallit Nunaat namminersulivippat naalaagaaffeqatigiinnerlu eqqarsaatigineqassanngitsoq.

- Namminersulerusukkutta namminneerluta tunngaviusumik inatsiseqassaagut. Kisianni namminersulivikkusunngikkutta naalagaaffiup ataani naalagaaffimmut naleqqussakkamik inatsit naluara sumut iluaqutaassanersoq, tunngaviusumik inatsisissamut isumalioqatigiissitami siulittaasoq, Vivian Motfeldt taama oqarpoq.