Assi: KNR/Arkiv

Ilisimasalik: Tunngaviusumik inatsiseqaraluarluni naalagaaffimmit tapiissutisiaqarsinnaasoq

Nunatta danskit tunngaviusumik inatsisaata avataani tunngaviusumik inatsimmik akuersissuteqassaguni naalagaaffimmit tapiissutisisarunnaarnissaa statsministerip mianersoqqussutigaa. Tamannali piviusorsionngitsoq, ilisimasalik isumaqarpoq.

Nunatta danskit tunngaviusumik inatsisaata avataani tunngaviusumik inatsimmik akuersissuteqassaguni naalagaaffimmit tapiissutisisarunnaarnissani aarleqqutigisariaqanngilaa.

Aarlerinissamulli ernumassutissaqanngikkaluartoq, taama oqaannarnissaq taama ajornanngitsiginngilaq.

Danmarkimmi nunarput apereqqaarnagu, nunatsinnut tapisiissuteqartarunnaarsinnaasoq, inatsisinut atuutsitsinermut ministerip paragraf 20 atorlugu apeqquteqaammut akissuteqarluni allappoq.

Naalagaaffeqatigiinnermik oqaasertaqanngitsumik nunarput tunngaviusumik inatsimmik akuersissuteqarpat, naalagaaffimmit tamanna aninertut isigineqassasoq, statsministeri Lars Løkke Rasmussen folketingip oqaluttarfianit maajimi oqarpoq.

AAMMA ATUARUK Tunngaviusumik inatsit akisusinnaasoq

Taamaattoqassappallu naalagaaffimmit tapiissutit ukiut sisamat ingerlanerinnanni tunniunneqartarunnaassasut, statsministeri oqarpoq. Aamma tunngaviusumik inatsisip akuerineqarneranit ukiut amerlasuut qaangiuppata aatsaat namminersulissagaluaruttaluunniit.

- Kalaallit Nunaata namminersulernerata kingorna naalagaaffiup tapiisarnini nangitsinissaa suliaminillu nangitsiinnarnissaa takorloorsinnaanngikkiga paasilluarneqarnissaa piinnarlugu uteqqippara, Lars Løkke Rasmussen maajimi oqarpoq.

Taamalu oqarnera ilumoornersoq Alternativep Kalaallit Nunaat pillugu oqaasaqartartua, Roger Matthissen apeqquteqaateqarpoq.

Namminersorneq pillugu inatsimmi siunertarineqartunut unioqqutitsisoq

Inatsisinullu atuutsitsinermut ministerip, Søren Pape Poulsenip, akissutaani, aviisimit AG-mit allaaserineqartumi, atuarneqarsinnaavoq, Nunarput aperinagu naalagaaffimmit tapiissutit tunniunneqartarunnaarnissaannut aalajangiisoqassappat, tamanna namminersorneq pillugu inatsimmi siunertaasunut akerliussassoq.

- Danskit kisimiillutik inatsimmik allannguissappata, tamanna naalagaaffiit akornanni inatsisitigut aallaavigigaanni, Namminersorneq pillugu inatsimmi aallaaqqaasiummi allassimasunut naapertuutissanngilaq, Søren Pape Poulsen allappoq.

Inatsilli inatsisitulli allatut allanngortinneqarsinnaasoq, akissummi aamma allaqqavoq. Tassalu folketingimi inatsisinik suliaqarnermi. Taamaammallu Danmark nunatsinnit aperisaqaqqaarnani nunatsinnut tapiissuteqartarunnaarsinnaavoq.

AAMMA ATUARUK Namminerisamik tunngaviusumik inatsiseqalernermi tapiissuteqartarneq unissaaq

Akunnakusoortortalik

Taamaaliussagaluarunili naalagaaffeqatigiinni naligiinnissamik siunertaq unioqqutissavaa, tamannalu politikkikkut akunnakusoortortalittut ileqqorluttuliornertullu isigineqassasoq, tunngaviusumik inatsisinut ilisimasalik Ilisimatusarfimmilu adjunktiusimasoq, Jens Wendel-Hansen naliliivoq.

Taanna namminersorneq pillugu inatsisip ilaannut pissutilersuutigineqartutut saqqummiunneqartumut, tassalu nunatsinneersut namminersulernermut qaqugu aalajangernersut nunatta aalajangiisinnaanermut piginnaatitaaffeqarneranut, innersuussivoq.

AAMMA ATUARUK Ataatsimoortumik tapiissuteqartarneq ingerlaannassaaq

Taamaammat Danmarkimit namminersorneq pillugu inatsimmut namminneerlutik allannguinissaat maannakkut piviusorsiunngitsoq, Jens Wendel-Hansen isumaqarpoq.

- Statsministeri Kalaallit Nunaannit aallarnerneqartumik namminersulernissamut suliamik namminersorneq pillugu inatsimmut innersuussaqarluni aallartitsinissani inatsisitigut tunuliaqutissarsiorniassaguni, tamanna unammillernassasoraara, Jens Wendel-Hansen KNR-imut allappoq.

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!