Tunngaviusumik inatsimmut missingiut 2018-imi naammassisariaqanngitsoq
Tunngaviusumik inatsisissamut isumalioqatigiissitap inatsisissamut missingiummik, innuttaasunit akuerineqarsinnaasumik taasinerminnilu akuersissutigineqarsinnaasumik naammassisaqassaguni, ulapittorujussuussaaq. Tunngaviusumik inatsisinut immikkut ilisimasalik taama naliliivoq.
Innuttaasut tunngaviusumik inatsisissaq pillugu sulinermut peqataatinneqarnissaannut naalakkersuinikkut arlalinnik suliniuteqartoqartoq, namminiilivinnermut naalakkersuisoq, Suka K. Frederiksen, Qanoruumut marlunngormat oqarpoq.
- Naalakkersuisut tungaanninngaanniit, aallaqqaatigalugu oqallinnermi oqariartuutitta pingaarnersaasa ilagivaat, innuttaasut piginnittutut inissisimassasut, Suka K. Frederiksen ilaatigut oqarpoq.
Innuttaasut peqataatinneqarnissaannut suliniutit
Innuttaasut qanoq peqataatinneqarnissaannut arlalinnik suliniuteqartoqartoq, taassuma ilisimatitsissutigaa.
- Maannakkut naalakkersuinikkut arlariinnik suliniuteqarpugut, innuttaasunut ilaatigut oqariartuuteqarluta peqataanissaannut ammaassisussanik. Ilaatigut nittartakkat atortussaavarput, innuttaasunik ataatsimiisitsinerit ingerlattussaavarput, quppersakkanik arlalinnik suliaqartussaavugut, Suka K. Frederiksen oqarpoq.
AAMMA ATUARUK Innuttaasut peqataatinneqarnissaannik ilinniartut ujartuipput
Isumalioqatigiissitap inatsimmut missingiummik innuttaasunit akuerineqarsinnaasumik aappaagu naammassisaqassaguni ilungersortorujussuunissaanik tunngaviusunik inatsisinut ilisimasallip, Jens Wendel-Hansenip, naliliinerata kingorna Suka K. Frederiksen taama oqarpoq.
Aalajangiiffigineqariaannaanngitsut
Isumalioqatigiissitammi tunngaviusumik inatsisissamut sulinermini apeqquterpassuit ilanngussinnaavaat, soorlu kunngikkormiunut suli attaveqassanersugut, inatsisartugut qanoq aaqqissuussaassanersut kikkullu innuttaasuusinnaatitaassanersut.
- Uku tunngaviusumik inatsisini nalinginnaasumik ilaasartuni amerlasuut, imaaliallaannaq aalajangiiffigineqarsinnaanngillat, Jens Wendel-Hansen ilaatigut oqarpoq.
AAMMA ATUARUK Tunngaviusumik inatsisissaq pillugu ataatsimiititaliap anguniakkani angujuminaatsissavai
Nalunaarutigineqareersumut akerliliisoq
Aamma naalakkersuisunit tunngaviusumik inatsisissamut isumalioqatigiissitap siunnersuummut missingiummik 2018 naatinnagu naammassisaqarnissaanut siusinnerusukkut oqaatigineqartumut Suka K. Frederiksen akerliliivoq.
- Naalakkersuisoqatigiit isumaqatigiissutaanni allassimavoq, suliassaq taanna ukiunik marlunnik pingasunik sivisussusilik akuersissutigalugu ingerlanneqassasoq. Taamaattumik oqartoqarsinnaanngilaq, paarnaavillugu ukioq taannarpiaq matuvoq, Suka K. Frederiksen oqarpoq.
Taama oqarnera namminiilivinnermut naalakkersuisuugallarsimasup, Karl-Kristian Krusep, tusagasiuutinut novembarip ulluisa 23-anni nalunaarutaanut illuatungiliivoq. Isumalioqatigiissitap inatsisissamut siunnersuummut missingiummik 2018-imi naammassisaqarsinnaanissaa qulakkeerniarlugu millionit affaannik pisassaqarnerutinneqarluni nukittorsarneqassasoq, Karl-Kristian Kruse taamani allappoq.
Aamma isumalioqatigiissitap 2018-ip kingorna sulinissaanut aningaasanut inatsimmi immikkoortitsisoqanngilaq.
