Tunngaviusumik inatsisitaarnissaq oqallisaaqqilertoq

- Namminersorneq pillugu inatsimmi periarfissaareermat tunngaviusumik inatsiseqalernissarput maanna aallarnisarneqartariaqarpoq. Neriuutigaaralu tunngaviusumik inatsisissap qanoq ittuunissaa pillugu qulaajaasussat tamarmik kalaaliujumaartut, Jens Immanuelsen oqarpoq.

Taanna aamma oqarpoq, tunngaviusumik inatsisitaaniarnitsinni suliaq naammassippat Nunatsinni marloqiusamik sullissineq taamaatinneqassasoq ilimagalugu.

- Ullumikkut ingerlatsineq akisoorujussuuvoq. Marloqiusamik oqaaseqarnerput kisimi akisunngilaq aamma assersuutigalugu, suliaq Pituffimmut tunngasoq. Tassani kikkut kiffartuussisussarsiornerup kukkusumik ingerlanneqarnera kikkunnit akisussaaffigineqarnersoq eqqarsaatigigaanni tamanna naalagaaffimmit tigummineqarpoq, tassalu tamanna inuiaqatigiit akornanni oqallitsitsivoq sakkortuumik. Taamaattumik tamakku eqqarsaatigalugit allanut aperiartorunnaarluta siunissami tamakku nammineruutigilersinnaavagut, Jens Immanuelsen oqarpoq.

Tunngaviusumik inatsit pillugu oqallinneq nutaajunngilaq

Inatsisartut 2011-mi ukiakkut ataatsimiinnerisa nalaani taamani Naalakkersuisut aalajangerput, tunngaviusumik inatsisitaarniarnermi toqqammaviusussamik ataatsimiititaliamik pilersitsisoqassasoq.

Sulinerlu tamanna 2013-imi aallartinneqarpoq 2014-imilu qinersinerup kingorna aamma ingerlanneqaqqilerluni.

Suliaq tamanna qanorluunniit akeqaraluarpat maanna naammassineqartariaqalersoq, Inuit Ataqatigiit sinnerlugit Inatsisartuni ilaasortaq, Aqqaluaq B. Egede oqarpoq.

- Aningaasanik naleqaraluarpalluunniit imminiussusissarput anguneqartariaqarpoq. Tassalu tunngaviusumik inatsiseqalernissarput tassaavoq namminiilivinnissamut toqqammavissarput. Taamaammat avaqqunneqarsinnaanngitsumik aningaasaliinerusussaavoq inatsisissaq pillugu ataatsimiititaliap sulilernera, Aqqaluaq B. Egede oqarpoq.

Aperisariaqanngilagulluunniit

Tunngaviusumik inatsiseqalernissarput maanna tassa pilersinneqartariaqartoq, Partii Naleraq aamma isumaqarpoq.

- Nunasiaatigineqalernitsinnit ukiut 300-t qaangiupput. Taamaattumik tunngaviusumik inatsiseqalernissamik eqqarsarnerput apeqquserneqartariaqanngilarluunniit allaat aperisoqaannarsinnaalluta, allamik periarfissaqaratta? Allamik periarfissaqanngilagut uangalu isumaga malillugu, tassa maanna periarfissanngorpoq tamassuma oqaluuserineqarnissaa, Partii Naleraq sinnerlugu Inatsisartuni ilaasortaq, Per Rosing Petersen taama oqarpoq.

Tunngaviusumik inatsiseqalernissaq pillugu piareersaataasumik ataatsimiititaliortoqarnissaanut siunnersuut Inatsisartuni aqagu siullermeerneqassaaq.