Tulukkamik qaqortumik pisaqartoq
Tulukkamillu pisaqartuuvoq Hans Japhet Filippussen, taannalu pisani paaralugu assilitissimavoq.
Timmiaq qaqortuinnaq, aamma albinomik taaneqartartoq, genitigit akornuteqarnermik enzymemik tyrosinasemik amigaateqalersitsisartumik peqquteqarpoq. Timi tyrosinaseliunngikkaangat timip aminosyreliornera unittarpoq timilu melaniniliorsinnaajunnaarluni. Uumasoq qaqortuinnaq taamaasilluni meqqumigut, isikkamigut, siggummigut pisattamigullu allatigut eumelaninimik phaeomelaninimillu amigaateqalersarpoq. Timmissat taama ittut qaamanermik sapigaqartuusarpoq isigiarsuttupilussuusarlutillu, aamma pinngortitami sivikitsuinnarmik uumasinnaasarput. Amerlanersaat ullutik qimakkaangamikkit toqusarput. Timmissat qaqortuinnaasut pinngortitami piaqqiorsimanerannut ullumikkut uppernarsaateqanngilaq, taamaammat Hans Japhetip pisarisaa qaqutigoorluinnartutut oqaatigisariaqarpoq.
Ilisarnaatit: Albinot meqqumikkut, siggumikkut, isimikkut amimikkullu qernertortaqanngillat, qasersortaqanngillat kajortortaqaratillu. Isaat amiallu aappaluartuusarput aavisa qalipaataat qaamanerusarmat. Carotenoideqarsinnaapput, taamaammat timmissat tigutsisillit qeerlutuulluunniit sungaartunik isigaqarsinnaasarput.