Tuluit yachtiat oqaluttuarisaanermut pingaarutilimmik Issittumi angalasoq

Tuluit angallataata yachtip alumiuniusup Sullualukkut Ruslandilu avannaqqullugu Kangianut aqqutikkut ukiup ataatsip iluani angalanini sapaatit-akunneranni matumani naammassivaa.

Tuluk angalatooq, David Hempleman-Adams, ilisimasassarsiornermi issittup imartaata sukkasuupilussuarmik sikueriartorneranik immikkut sammisaqartitsisussami siuttuuvoq. BBC News taama allaaserisaqarpoq.

Issittumi imaatigut aqqutit marluusut siornatigut angallavigineqarsinnaasimanngikkaluarput, ukiunili kingullerni sikueriartulersimapput qaammataasallu atorlugit sapaatit-akunneranni matumani uuttortaanerit takutippaat issittup imartaata sikuata siaruarsimassusianik uuttortaanerni annikinnerpaat tullerigaat.

Canadallu avannaata imartaani ima sikuunngitsigivoq Sullualukkoorneq sapaatit-akunnerinik marluinnarnik sivisussuseqarsimalluni.

Tuluit yachtiat Northaboutip Nunatta kitaata sineriaa atuarlugu ingerlaqqissaaq, angalaninilu Tuluit Nunaanni Bristolimi oktobarip qaammataani naammassissagaa naatsorsuutigineqarpoq.

Nunarsuup silaannaata ukiuni qulikkuutaani tullerni kianneruleriartornera ilutigalugu, Sullualukkut Ruslandilu avannaqqullugu Kangianut aqqutikkut aningaasarsiutigalugu imaatigut angallannerup annertusinissaa ilisimatuunit ilimagineqarpoq.