Tuluit nakorsat tupat lightit mianersoqqussutigigaat

Tupat lightitut akuutissakitsutullu tuniniarneqarneranni pilerisaarutigineqartartut puakkut kræftimik nappaatillit amerlanerinut peqqutaasinnaalluarpoq.

Tuluit peqqinnissamut oqartussaasui taama mianersoqqussuteqarput.

Tuluit naalakkersuisuisa peqqinnissamut ilisimatuuata professor, Liam Donaldsonip lightitut akukitsutullu taaguisarnerit, navianannginnerusutut paasineqarsinnaammata paatsuunganarsinnaanerarpai.

Taassuma taaguutit taakku allanngortinneqapallattariaqarneri tuluit naalakkersuisuisa peqqinnissamut ataatsimiititaliaanut oqaatigaa. 

- Tupamik navianngitsumik peqanngilaq. Tamanna misissorneqarluartariaqarpoq. Akuutissakitsunik tupasisartut ameriartorput, taamaalilluni kræftimik pilersitsisinnaasut akuutissallu allat puakkut kræfteqarfiulersartumiilersarput, Donaldson oqarpoq.

Paul Lincolnip tuluit peqqinnissamut oqartussaasuisa paasissutissiisarfianeersup naalakkersuisunut ilisimatusarneq pujortartartut 77 procentiisa tupat nalinginnaasut atorunnaarlugit lightit navianannginnerusoralugit pujortartalersimagaat paasineqarsimasoq innersuussutigaa.

Lincolnip peqqinnissamut oqartussat 80-ikkut qeqqaniilli politikkikkut unioqqutitsisimanerarpaat, tassanimi naalagaaffimmit oqaatigineqartarsimavoq, pujortassaarsinnaanngikkaanni tupanik lightinik akuutissakitsunillu atuisoqalertariaqartoq.

- Ullumikkut inuit pujortassaaveqqusarpagut, Lincoln oqarpoq.

Dawn Milnerip tuluit peqqinnissamut ministereqarfianeersup tupanik isumannaannernik pilersitsiniarneq aallutiinnartariaqarnerarpaa.

- Soorunami tupat tamarmik navianartorujussuupput. Pujortartartuerunnissaa tamatta kissaatigaarput. Taamali unitsitsisinnaajunnaarsimasut amerlatigitillugu tupanik isumannaannerusunik pilersitsiniartariaqarpugut.

Nakorsap Mick Peakep Pontefracts Hospitalimeersup oqaatigaa – tupat akuutissakitsut kræftimik tinunermik pilersitsisinnaalluartut.

- Millunnerugaanni puami appasinnerusumi immaqa tinunermik navianartumik pilersitsisinnaavoq, Mick Peake oqarpoq.