Tuluit EU-mut naaggaarnerat aktiaatinik nioqquteqarnermut eqquinerluppoq
Tuluit EU-mi ilaasortaajunnaarnissaat ilimagineqarsimanngikkaluarpoq, siunissarlu pillugu isumakulunnartinneqarluni. Tuluimmi saniatigut nunat Europamiittut suleqatigiinnerat qajannarsisinnaasoq ernummatigineqarpoq.
Aktianik Danmarkimi nioqquteqartarfimmi ((OMX C20)) aktiat nalingi 4,1 procentinik tallimanngormat appariarput, ullumilu aamma nalikillinerullutik.
- Tuluit EU-mit aninerat politikkikkut aningaasarsiornikkullu qanoq kinguneqassanersoq kialluunniit siulittuutigisinnaanngilaa, aningaasaliinermut aningaaserivissuaq Carnegie ullumi taama nalunaaruteqarpoq.
((Tuluillu naalagaaffeqatigiiffianni politikkikkut pissutsit sapaatip-akunnerata naanerani pitsaanerulinngillat. Ministeriunerup David Cameronip tunuarniuteqarniarnini nalunaarutigaa, partiimi illuatungiliuttumi Labourimi avissaartuuttoqarpoq, siulittaasualu ajornartorsiorpoq.
Tuluit aningaasaqarnermut ministeriat George Osborne innuttaasunut eqqissisaaniarsarivoq:
- Tuluit oqarfigerusuppakka: Tuluit naalagaaffeqatigiiffat EU-mit aninissamut piareersimavoq, ajornartorsiutinut takkukkumaartussanut piareeqqalluni, aningaasarsiornerpummi ingerlalluarpoq, George Osborne oqarpoq.))
