Tulugaq qaqortoq albinoonngilaq

Timmissamik allaanerusumik qalipaatilimmik takugaanni qanorpiaq taaneqassanersoq nalornisigineqakkajuttarpoq: Albinisme, leucisme imaluunniit allartuinnaq pissutigalugu allaanerusumik qalipaateqarnerpa? Taaguusersuutit taamungaannaq atorneqartarput amerlanertigungajallu kukkusumik atorneqartarlutik.

- 'Albino'-nani 'Ino'-voq. Tulukkap 'Ino'-neranut suluisa iluatungaanni kajortunik qaamasunik meqqoqarnera ilisarnaataasartoq, Knud N. Flensted Dansk Ornitologisk Foreningimeersoq KNR.gl-imut oqaluttuarpoq nangillunilu.

- Timmissat allanngortunik kingornussallit tulukkanut tunngatillugu qaqutigoortupilussuupput. Timmissatut taakku marluk assigiinngissutigisaat tassaavoq 'Ino'-t toqunneqanngikkunik allatigulluunniit toqunngikkunik ukiorpassuarni uumasinnaasarmata, 'Albino'-llu pinngortitami piffissaq sivikitsuinnaq uumasinnaasarmata, isigiarsuttorujussuusaramik.

'Albino' qaallorissuusaarpoq aappaluttunik qaamasunik iseqarlutik, 'Ino'-llu sungarpalunnerusarlutik suluisa iluatungaat kajornerulaarlutik isaallu aappaluttuusarlutik. Timmissat ’Ino’-t arnaviaasuaannangajapput, taamaammat tulugaq pisarineqatoq aamma arnaviaanissaa ilimanarpoq.

Tulugaq Pinngortitaleriffimmut tunniunneqarsinnaasuuppat pitsaassagaluaqaaq, Knud N. Flensted naggasiiluni oqarpoq.