Trumpip uuliap aqqutissaanik sanaartornissamik tapersersuinissaa indianerit ernumassutigigaat
Uuliap aqqutissaanik suliniutip angisuup inaarutaasumik akuersissutigineqarnissaata amerikamiut sakkutuuinit ingeniørinit itigartitsissutigineqarmat USA-mi North Dakotami Indianerit siouxit tusarluartinneqarput.
Uuliasioqatigiiffik Energy Transfer Partners naalagaaffiit sisamat aqqusaarlugit uuliap aqqutissaanik kilometerinik 1886-inik isorartutigisumik sanaartorniaraluarpoq, tamannali sakkutuut ingeniørit USACE-meersut itigartitsissutigigallarpaat.
Indianerilli siouxit tamatuma nuannaarutiginissaa tunuarsimaarfigaat, Donald Trumpimi præsidentitut januaarimi ivertinneqarpat uuliap aqqutissaata piviusunngortinneqarnissaa indianerit ernumassutigaat.
- Apeqqutit akissutissarsinngisagut suli arlaqarput, Dallas Goldtooth akerliusut siuttuisa ilaat taama oqarpoq.
- Apeqqutit annerpaartaat tassaavoq Trumpip naalakkersuisui qanoq iliussanersut, Dallas Goldtooth oqarpoq.
Uuliap aqqutissaa indianerit siouxit reservatiatigut Standing Rockikkoortussaavoq.
Taamaammat uuliap aqqutissaata imermik mingutsitsinissaa illernartuutitanullu ulorinartorsiortitsinissaa indianerit avatangiisinillu illersuiniaqatigiit ernumassutigaat.
Trumpip attaveqaqatigiinnermut pisortaata Jason Millerip indianerit Standing Rockimeersut ernumassuteqarnerat ataasinngormat uppernarsarpaa.
- Sanaartorneqarnissaa tapersersorparput, Jason Miller oqarpoq.
- Præsidentip Illorsuanut iserteriarutta misissussavarput, taamaalilluta eqqortumik aalajangiisinnaaniassagatta.
/ritzau/AFP
