USA-p præsidentiata, Donald Trumpip ataqqinninngitsumik uillartumut misiginneqatiginninnerminik apuussisimaneragaanini ulluni kingullerni miserratigilluinnarpaa.
Tv-qarfiulli ABC Newsip uillarneq, Myeshia Johnson apersormagu taassuma Trumpip oqarasuaatikkut oqaloqatigiinnerup qanoq ingerlasimaneranik oqaluttuarnera akerlilerpaa.
Præsidentip oqaasiisa ”qianerutiliinnarpaanga”, ABC Newsimut oqarpoq.
Sergenti La David Johnson Nigerimi sakkutooqatini pingasut ilagalugit Islamisk Statimit saassunneqarnerminni oktobarip sisamaani toqutaapput.
Myeshia Johnson naapertorlugu Trumpip Myeshiap uiata sumut akuliunnini nalunngikkaluaraa tamanna artornartuusimassanerarpaa.
- Tamatuma qiatippaa, nipaa oqariarneralu kamaatigingaarpakka, Myeshia Johnson oqarpoq.
- Uima aqqa eqqaamanngilaa. Taamaallaalli allagartaasa saaminiinneratigut uima aqqa eqqaamavaa oqarlunilu La David, Myeshia oqarpoq.
Tamannali tv-ikkut ataasinngorat apersorneqaqqammiinnartoq eqqunnginnerarlugu Trump twitterimi allappoq.
- Sergent La David Johnson pillugu uillartoq ataqqinningaarlunga oqaloqatigaara aqqalu nangaassuteqarnanga aallaqqaammulli taasarlugu, præsident allappoq.
Demokratinit kongresimut ilaasortaq, Frederica Wilson uillartoq ilagalugu biilerlutik sakkutuup ilerra aajartoraat Trump oqarasuaatikkut sianerpoq.
Wilson ilaqutariit Johnsonikkut ukiuni arlalinni ikinngutigaat
Oqarasuaat biilini ilaasut sisamat tamarmik tusaasinnaasaanut nippatsissimallugu, Myeshia Johnsonip oqaatigaa.
Frederica Wilsonip præsidentip oqaasii sapaatip akunnerata siuliani saqqummiummagit Trumpip kongressimut ilaasortaq ”silaqannginnerarpaa”. Wilsonillu oqaloqatigiinnerup qanoq inneranik issuaanera ”salluliuinnerunerarlugu”.
/ritzau/AP
