Trumpip ningaani atorfinitsikkaa
Allaffeqarfik Amerikami Nutaaliornermut allaffeqarfimmik taaguuteqartoq, Trumpip ningaavata Jared Kushnerip siuttuuffigissavaa. Aviisi Washington Post taama allaaserisaqarpoq.
Kushner præsidentimut toqqaannartumik atassuteqassaaq.
Inuussutissarsiortunit isumassarsianik Præsidentip Illorsuani atuutilersitsiniarnerup saniatigut, suliassaqarfiit naalakkersuisunit maannamut isumagineqartut namminersortunngorsarnissaat Kushnerip aamma siuttuuffigissagunarpaa.
Atorfilittaq atiatigut taaneqanngitsoq taama oqarpoq, Washington Postillu paasissutissat pissarsiarisimasai aamma uppernarsarlugit.
- Naalakkersuisut Amerikami suliffeqarfissuartut ingerlatsisariaqarput. Sullitatta - tassalu innuttaasut - siuariartornissaat pisariillisaavigineqarnissaallu angusinnaassallugu neriuutigaarput, Kushner aviisimut taama oqarpoq.
Kushnerip, Trumpip pania Ivanka nuliaraa, taannalu Præsidentip Illorsuani allaffeqareerpoq.
