Trumpip inatsisiliaa eqqartuussisup atorunaarsippaa

Amerikamiut præsidentiata Donald Trumpip  innuttasut ingammik nunanit muslimiusunit USA-mut iseqqusinnginnermik inatsisiliornera inatsisiliornermi ajorsarnerit annertunersaannik eqqugaaqqavoq. 

Naalagaaffimmi Washingtonimi illoqarfimmi Seattlemi eqqartuussisup USA-mut iseqqusinnginnermut Trumpip tallimanngormat siuliani atuutilersitaata atorunnaarsinneqarallarnissaanik peqqusisimavoq. 

Taama eqqartuussisup peqqussisimanera præsidentip illorsuanit Det Hvide Husimit assuarnartutut taaneqarpoq,   nutaarsiassaqartitsiviullu AFP allaaserisaa naapertorlugu USA-mut iseqqusinnginnermut inatsisiliorneq inatsisit malillugit naleqquttumillu atuutilersinneqartoq, præsidentip illorsuanit taama nalunaaruteqartoqarpoq.  

USA-mi inatsisinut atuutsitsinermut ministereqarfimmit Washington D. C. -mit nalunaarutigineqartut naapertorlugit Seattlemi eqqartuussisup aalajangernera sapinngisamik kinguartinneqassasoq. 

USA-mi naalagaaffinni arlalinni eqqartuussisut,  Donald Trump USA-mut iseqqusinnginnermik inatsisiliornera akerleralugu sapaatit akunneri kingulliit arlaqartut nalunaarput.  

Taamaattorli Seattlemi eqqartuussisup  James Robartip aalajangernera sunniuteqarnerpaasimasoq, nutaarsiassaqartitsivik AFP taama allaaserisaqarpoq. 

Seattlemi eqqartuussisup  James Robartip aalajangernera aallaaveqarpoq,  naalagaaffinni Washingtonimi Minnesotamilu iseqqusinnginnermut inatsiliornerup   naammagittaalliuutigineqarnera.  Kisianni tassa Seattlemi eqqartuussisup aalajangernera nunamut tamarmut atuuttussanngortinneqarpoq. 

- Nunami naalakkersuinikkut aaqqissuussineq ullumi ajugaavoq.  

- Inatsisinut annerusumik oqartussaasoqanngilaq allaat præsidenti aalajangiisinnaanani,  Bob Ferguson  naalagaaffimmi Washingtonemi inatsisinut atuutitsinermut ministeri taama oqarpoq.