Trump Clintonilu Super Tuesdayimi iluatsitsilluarput

USA-mi præsidentinngorniunneq sioqqullugu Naalagaaffinni aqqaneq-marlunni partiit præsidentitut sassartitassaannik marlunngormat Super Tuesday-imik taallugu qinersisoqarmat Donald Trump aamma Hillary Clinton ajugaapput, USA-mi naalagaaffini arfineq-marlunni ajugaasutut taaneqarlutik.

Hillary Clinton American Samoami aamma ajugaavoq.

Taamaalillutik amerikamiut præsidentimut qinersilerunik taakku marluk qinigassarissagaat ilimanarsiartorpoq.

Demokratini præsidentimut qinigassanngorteqqusaartup aappaa Bernie Sanders naalagaaffinni sisamani ajugaavoq.

Republikanerini Ted Cruz naalagaaffinni pingasuni ajugaavoq, Marco Rubiolu ataatsimi ajugaalluni.

Taamaammat Hillary Clinton aamma Donald Trump partiitik sinnerlugit præsidentitut qineqqusaartussani nukittunerulerput.

Donald Trumpilu USA-mi præsidintinngorsinnaanera eqqarsaatigineqartariaqalertoq, Danmarmiki nunanut allanut ministeri Kristian Jensen isumaqarpoq.

- Taassuma qanoq eqqarsarneranik eqqoriaanissaq ajornarpoq. Præsidentinngussagaluarpat USA-mut suleqatigiinnissaq artornarsinnaassaaq, maannatummi pissuseqaannassappat aqagu qanoq isumaqassanersoq nalunassagami. Uagut ikiaqutitta taarsertarneritut akulikitsigisumik isummani allanngortittarpaa. Trump præsidentiussappat suna sulissutigissaneripput nalunartorujussuussaaq, Kristian Jensen oqarpoq.