Troels Kløvedalip skleroselernermi kingorna toqorusuttunik ikiuisarneq tapersersuleraa
Imaatigut angalatooq atuakkiortorlu Troels Kløvedal napparsimasupilussuanngorsimavoq, ungasinngitsumilu toqusussanngornini atuakkiami nutaami oqaluttuaraa.
Puakkut nappaat bronkiektasi, aamma sklerosemik nappaat pilertortoq ALS 73-inik ukiullip Kløvedalip nappaatigai.
- Toqusussanngornera qularnanngilaq. Allat ukiualuit qaangiukkaangata toqqutigisarpaat, uangali qaammatit marluk ukiulluunniit affaa qaangiuppat toqqutigissavara, aviisi BT naapertorlugu atuakkami "Modne Mænd"-imi juulip qaammataani apersorneqarnermini taama oqarpoq.
Troels Kløvedalip umiarsuamik Nordkaperenimik ukiorpassuarni angalasarnini tv-kkut atuakkatigullu angalanilikkersaarutigisarpai. Umiarsuaq taassuminnga pingasoriarluni nunarsuarmik kaajallaasimavoq.
Ukiuni kingullerni angalajunnaarluni oqalugiarneq aallunnerulersimavaa, nappaateqalerninili pissutigalugu aamma oqalugiartarnini unitsittariaqalersimallugu.
ALS-ip qaratsami qiteqqamilu sianiutit cellii nungukkiartortittarpai timilu nukillaariartortittarlugu.
Troels Kløvedalip toqunissani akuerereersimaneraraluarlugu nukillaarnissani toqulerunilu naalliunnissani pissutigalugit toqorusuttunik ikiuisarneq pillugu isummani allanngortissimavaa.
- Toqunissara akueraara. Inuuninni misilittakkakka tamatumunnga iluaqutigilluarpakka. Nukillaartussanngornerali akuerisinnaanngilara, taamaammat aamma toqorusuttunik ikiuisarneq pillugu isumaga allanngortippara, atuakkami
"Modne Mænd"-imi sapaatit-akunneranni matumani saqqummertussami taama oqarpoq.
- Inatsisiliorneq siornatigut isumaqataaffigaara, ullumikkulli isumaqarpunga toqurusukkaanni tamanna pisinnaatitaaffigineqartariaqartoq. Sooq toqusussanngoreerluni nukillaarsimalluni naalliuttoqartariaqarpa, Troels Kløvedal BT naapertorlugu taama oqarpoq.
Troels Kløvedalip nunatta kitaata sineriaatigut angalaneranik nangeqattaartuliaq 2001-imeersoq DR-ip maannakkorpiaq aallakaateqippaa.
/ritzau/
