Pissartanngorniutivittussat takukkit

Anorersuup takkutinnginnerani eqqissisimaneq. Afininngornermi unamminerit assersuunniaraanni taama oqartoqarsinnaagunarpoq.

Narsaq Qaanaarlu pissangatitsisut

Arfininngormat unamminerit tamarluinnangajammik pissanganinngillat. N-85, Narsameersut, aamma QNQ, Qaanaameersut unammimmata pissangatitsisutuaapput.

Holdit taakku pissartanngorniunnerni suli ajugaanikuunatik naapipput. Tamannalu angusaminnik kusassaanissamut periarfissiivoq.

QNQ-kut aalartilluarpoq, taamaattorli unammisaqattaarnerni takusariikkatsitut saassussinerni kukkuluttorput assersuinerminnilu iluatsippallaaratik. Soorlu N-85 aamma taamaatut ingerlasoq.

Muminnginnermi unammineq siumut utimullu ingerlavoq. Muminngitsiarnermilu Qaanaarmiut arsartuat ataaseq minutsini marlunnik anisitaammat ikinnerussuteqalerput. Tamanna Narsarmiut atorluarpaat målinillu pingasunik siuarlutik.

Mumereernermi QNQ-kut ikinnerussuteqarlutik aallartikkamik aallartinnerliorput.

N-85-imi arsartoq, Nuka Peter Ottosen K-33 arsartarnikoq, muminnginnermi takussaarpianngeriarluni uterami sukappoq. Målertpqarnerit tamaasa akuusalerpoq, namminerlumi aamma måleqattaarluni.

N-85 33 - 31-mik ajugavoq, Nuka Peter Ottosen aaliangiisuulluni. Taanna tupaallannanngitsumik unamminermi arsarluarnerpaatut toqqagaavoq.

Pissartangorniutivinnerit pissanganartut

GSS-ikkut angutupai pissartanngoqqinnissaat ilimanaateqarnerpaajuvoq. Taamaattorli naatsorsuutigineqarnerat arsarnerannut sunniuteqarnerloratarsinnaavoq. Ukioq manna unammisut akornanni GSS-imut ajugaasinnaasoqarpat Norsaq HC-ssaaq.

Norsaq HC-kkut ukiut siuliinut sanilliullugit ineriartupiloorsimaqaat. Piginnaasalinnik nukittuunillu inuusuttunik arsartoqarput. Taakku pissartanngornissaq siunertaralugu arsassasut qularnannanngilaq, taamaattorlu sølvinnakkunik aamma naammagissavaat taamaammallu annaasassaqaratik. Illuatungaani GSS annaasassanik ulikkaarpoq.
Norsaq HC GSS-ilu ippassaani naapimmata GSS ajornartorsiortiaavissorpoq, målinilli sisamanik ajugaalluni.

Arnani GSS NÛK naapissavaat. GSS-ikkut pisarnertut piareersarluarsimaqaat. Tamaattorli NÛK-kut aamma piareersarluasimaqaaq GSS-ikkutulli aamma guultinnakkusutsigalutik. Unammineq taanna pissangananngitsuussanngilaq.

Angutini N-48 Ilulissaneersut Nuummeersut NÛK bronzinnanniunnermi naapissavaat. Taakku naapikkaangamik sakkortusaartarput pissangatitsisarlutillu. Holdit taakku bronzi tuppallersaatigerusussavaat, unamminerullu inernissaa siulittoruminaassalluni.

SAK, Sisimiut, aamma N-48, Ilulissat, arnartai bronzinnanniutilerunik SAK, Linda Madsen siuttoralugu, ilimanarnerupput. Taamaattorli N-48 Gerdaaraq Ingemann siuttoralugu bronzi tilleratarsinnaavaat.

Sapaammi unammisussat:
Arnat:

Nal. 11 Kâgssagssuk (Maniitsoq) - Norsaq HC (Aasiaat)
Nal. 14 SAK (Sisimiut) – N-48 (Ilulissat) bronzinnanniutissapput
Nal. 17 GSS og NÛK, Nuummeersut, pissartanngorniutissapput

Angutit:  
Kl. 12.30 SAK – N-85
Kl. 15.30 NÛK – N-48 bronzinnanniutissapput
Kl. 18.30 GSS – Norsaq HC pissartanngorniutissapput

Unamminerit KNR-TV-kut isiginnaarneqarsinnaapput.