Tour de France toqqaannartumik aallakaatinneqassanngilaq

Frankrigimi sikkilerluni unammersuarnerit Tour de France KNR-TV-kkut ukiormanna toqqaannartumik aallakaatinneqassanngillat. Aallakaatitassianut avataaneersunut pisissutissat aningaasat ikilisimanerat tamatumunnga peqqutaavoq.
Allattoq Gedion Storch
juunip 30-at 2011 15:56

DR-ip unnukkut aallakkaatittagaa, Aftentour, tassa unamminerit killiffiinik pingaarnersiuineq, unnukkut nalunaaqutaq 21.35-p missaani aallakaatinneqartassaaq.

Tamatuma saniatigut KNR-ip neriuutigaa qaqqani ingerlaarfiit aalajangiiffiusut toqqaannartumik aallakaatinneqarsinnaassasut, tamatumunnga aningaasaleerusuttoqassappat.

Taamaalilluni Tour de France tv-qarfinnut tv2-mik aallakaatitsisartunut ilaasortaasunit taamaallaat takuneqarsinnaassaaq.

Ilaatigut Nuuk tv-mi aamma Arctic tv-mi TV2 aallakaatinneqartarpoq, aallakaatitalli toqqaannartumik aallakaatinneqarneq ajorput, aamma taamatut pisoqassaq Tour de Francertoqarnerata nalaani.

Taamaalillutik Sisimiormiut nunatsinni amerlanngitsuinnat peqatigalugit Tour de France toqqaannartumik isiginnaarsinnaassavaat, TV2-p attavia Sisimiut Tv-ata toqqaannartumik aallakaatittarmagu. Soorlu aamma Eurosportip Tour de France toqqaannartumik aallakaatissavaa.

Nunarsuarmi sikkilerluni unammersuarnerit sakkortunersaat arfininngorpat aallartissaaq.