Toqutsisimasutut eqqartuussaq misiligummik iperagaalersoq

Toqutsisimasutut eqqartuussaq Abel Klemensen, Herstedvesterimut inissinneqarluni ukiuni 25-ngajanni pillagaaqqareerluni misiligummik iperagaasussanngorpoq.

Allattoq Inge S. Rasmussen

decembarip 18-at 2015 04:54

Nutserisoq Simon Uldum -

Ukiuni sisamani tallimaniluunniit misiligummik iperagaaqqassanersoq Nunatta Eqqartuussiviani ullumi aalajangiiffigineqassaaq.

Abel Klemensen 1991-imi 18-inik ukioqarluni toqutsisimasutut toqutseriarsimasutullu piffissami killiligaanngitsumi inissinneqartussatut eqqartuunneqarpoq.

Pisumi alianartumi inuit arfineq-marluk Narsami ukiortaap ullaakkuani toqutaapput.

Abel Klemensen ullumikkut 44-nik ukioqartoq kingorna misiligummik iperagaanissaminik arlaleriarluni qinnuteqartaraluarpoq, kingullermik 2011-mi, itigartinneqartarlunili.

Aamma atuaruk Misiligummik iperagaagallarneqassanersoq aalajangiiffineqassaaq

Misiligummik iperagaanissaa Eqqartuussisoqarfik Kujallermi ukiormanna juunip qaammataani aalajangerneqarpoq. Eqqartuussinermi allattugaatit naapertorlugit Abel Klemmensen nassuiaavoq eqqissilluni maanna inuulluni.

2010-miilli namminerisaminik ineqartinneqarpoq Pinerluttunillu isumaginnittoqarfimmit nakkutigineqarnermini isumaqatigiissutit tamaasa eqquutsissimallugit.

Kisimiittuuvoq inissiamilu kisimi najugaqartuulluni. Ukiuni kingullerni aqqanilinni entreprenøritut suliffeqarfimmi sulisuuvoq, eqqartuussinermilu allattugaatit naapertorlugit sulisitsisuminit iluarineqarluni.

Suliap ingerlanneqarnerata sivisuallaarnera pissutigalugu Eqqartuussisoqarfik Kujalleq aalajangerpoq ukiuni sisamani misiligummik iperagaassasoq.

Unnerluussisussaatitaasulli ukiuni sisamani misiligummik iperagaanissaanik kissaateqarput taamaattumillu suliaq Nunatta Eqqartuussivianut ingerlateqqinneqarluni.