Toqutsineq meeqqanillu arsaarinninneq
Sapaatip akunnerata naanerani sinerissami illoqarfinni akissarsisoqarlunilu feriepengesisoqarnera politiinik ulapitsitsingaatsiarsimavoq.
Ilulissani angut 38-nik ukiulik arfininngormat unnukkut inimini toqungasoq nassaarineqarpoq. Toqutsisutut pasisaq 21-nik ukiulik unnuakkut tigusarineqarsimasoq, Ilulissani politeeqarfiup pisortaa Bent Heiselberg ilisimatitsivoq.
Pasineqartoq ippassaq killisiorneqarnermi kingorna sapaatip akunnerini sisamani tigummineqarallartussanngortinneqarpoq. 21-nik ukiulik nassuerpoq toqutaasup inaaniissimalluni assortuussimallutillu.
Sisimiuni meeqqat mikisut marluk sapaatiummat ullaassakkut angerlarsimaffianniit peerneqartariaqarsimapput. Saniliusut meeqqat qiarpaluannik tusaasimallutik plitiinut kalerriisimapput, politiillu inissiamut namminnerlutik isertariaqarsimapput. Tassani siumorsimavaat naalungiarsuk qiteqquteqqammersimagunartoq, issiaviup ataani nalasoq, sanianilu nukappiaraq alla atisaqarani qiasoq nassaarineqarsimalluni, politeeqarfup pisortaa Hans Falck-Petersen oqaluttuarpoq.
Nuummi angerlarsimaffinni eqqissiviilliortoqangaatsiarsimavoq, biilinillu aserorterisoqangaatsiarsimasoq, politeeqarfiup pisortaata tullia Johan Davidsen oqaluttuarpoq.
