Timmissat piniagaanerannut malittarisassat nutaat

Timmissat killilersugaanngitsut piniagaanerat septembarip aallaqqaataani aallartissasoq Namminersorlutik Oqartussat eqqaasitsissutigaat.
aggustip 18-at 2017 14:24

Timmisat pillugit nalunaarut ukioq manna januaarip ulluisa arfernanni nutarterneqarpoq, taannalu naapertorlugu timmissat killilersugaanngitsut piniagaanerat septembarip aallaqqaataani aallartissalluni.

Timmissanut nalunaarummut 2009-meersumut allannguuteqarpoq.

Taateraat nunap immikkoortuini tamani septembarip aallaqqaataanit piniagaalissapput:

- Taateraat timmissat killilersukkanut ilanngunneqarnikuupput, sunngiffimmi imaluunniit inuussutissarsiutigalugu piniarnermut allagartallit ullormi aallaaniarfiusumi ataatsimi amerlanerpaanik qulinik nammineq atugassatut pisaqarsinnaapput, Namminersorlutik Oqartussat nittartakkaminni taama ilaatigut allaaserisaqarput.

Nerlernaarsuit piniagaanerannut ullut aamma allanngorput, tassa aggustip aallaqqaataanit oktobarip ulluisa 15-iata tungaanut piniagaalerlutik.
Kangorniarneq septembarip aallaqqaataani aamma aallartissaaq, oktobarip 15-iat ilanngullugu piniarneqarsinnaallutik.

Qaqulluit nunap immikkoortuani Zone 2-mi aamma piniarneqarsinnaapput, qaqulluit piaraannik ileqqutoqqat naapertorlugit aggustip ulluisa 15-iannit piniarneqarsinnaalerlutik.