AWG2016 Timmisartuussinerit aallartipput

Arctic Winter Gamesimut unammeqataasussanik Nuummut timmisartuussinissat akunnerit 24-nik kinguaattooreerlutik maanna aallartipput. Timmisartoq unammiuaarnissanut peqataasussanik ilaasulik siulleq Nuummut nalunaaqutaq 12:15 tikippoq
Assi © : Johansinnguaq Olsen/KNR
marsip 06-at 2016 12:43
Nutserisoq Ivik Kristiansen

AWG-mut peqataasussat 600-ngajaat Nuummi silarlunneq pissutigalugu Kangerlussuarmi arfininngormalli uninngapput, amerlanerujussuillu, ilaatigut Nunavimmit Nunavummiillu, Kangerlussuarmut ullumi sapaammi tikittussaallutik. Arctic Winter Gamesimut peqataasussat Nuummukartinneqarnissaannut timmisartut 31-t aallartinneqassapput.

Timmisartuussinerillu aallartinneri AWG-p aaqqissuisuinit nuannaarutigineqarpoq.

- Nuannaaqaagut. Kiisami, AWG-mi pisortap tullersortaa Arnakkuluk Kleist oqarpoq.

Timmisartuussinerilli kinguaattoorneri pissutigalugu unammiuaarnissamut peqataasussat ilaat Inussivimmi unnugu arfineq pingasunut ammaanersiornermut peqataasinnaassanngillat.

- Soorunami ajuusaarnarpoq, silamuli aqussinnaanngilarput. Unammeqataasussalli unammiuaarnerit aallartinnissaannut apuussimanissaat pingaarnerpaajuvoq, Arnakkuluk Kleist oqarpoq.

Timmisartuussinerni timmisartup kingulliup Nuummut unnuaru nalunaaqutaq pingasut missaanni tikinnissaa naatsorsuutigineqarpoq.