Timmisartut anginerugunik billettit akikinnerussasut
Air Iceland Connect Nuup Ilulissallu akornanni timmisartumik anginerusumik timmisartuussisalernissamut qilanaaruteqartoq taama oqarpoq.
- Mittarfiit tallineqarnissaat periarfissarpassuanitsitsissasoraara, islandimiut timmisartuutileqatigiiffianni pisortaq, Árni Gunnarsson oqarpoq.
AAMMA ATUARUK Stort turismepotentiale i Grønland
AAMMA ATUARUK Nunatsinni timmisartukkut angallassineq periarfissagissaarnerusoq
Timmisartut anginerusut iluarnerusullu
Air Iceland Connectip illoqarfiit Dash 8-imik, 37-nik ilaasoqarsinnaasumik maanna timmisartuussiffigisarpai.
Suliffeqarfiulli mittarfiit 2.200 meterimut tallineqarneratigut, Dash 8-p angajua aqqutini taakkunani atorsinnaalissavaa.
Timmisartumut ilaasartut marloriaammik amerlanerussanerisa saniatigut Dash 8-miit taakku atoruminarnerupput.
- Timmisartoq, Q400 sukkanerullunilu nipaanneruvoq. Taamaammat timmisartuussinerit iluarnerulerlutillu sivikinnerulissapput.
Norgemiut nunatsinnik soqutiginnittut
Air Iceland Connectilu naapertorlugu timmisartut anginerulerneratigut akit appassapput tamannalu norgemiut angallatsitsiviata, Storm Eventip nuannaarutigaa.
Suliffeqarfik Svalbardimut Savalimmiunullu angallassinissamik ullumikkut neqerooruteqartarpoq, Norgemiunullu suli alutornarnerusumut angalanissamik neqerooruteqarsinnaalerusuppoq. Ullumikkulli angalanerit ungasissusaat akisunerallu unammillissutaasarpoq.
- Nunarujussuuvoq sumukarfissallu ungasissuupput. Taamaammat timmisartornissap akisuneri ajornartorsiutaangaatsiartarput, Storm Eventimiit, Petter A. Bjørge oqarpoq.
AAMMA ATUARUK Nunarput soqutigineqarluartoq
Akitsuutit qanoq inneri apeqqutaassasoq
Air Iceland Connectilli mittarfinnik atuinerup qanoq akeqarnissaa suli ilisimannginnamiuk, billettit qanoq akikitsigilersinnaassanersut maannakkut oqaatigisinnaanngilaa.
- Akitsuutit qaffanneqassappat, apparneqassappat imaluunniit akit taamaaginnassappat. Tamakku aamma timmisartuussisarnerup qanoq akeqartinneqarnissaani eqqarsaatigineqassapput, Air Iceland Connectimi pisortaq, Árni Gunnarsson oqarpoq.
AAMMA ATUARUK Mittarfiit talliinnarnerisigut takornariat amerliartulernavianngillat
