Timmisartup nakkarneranut misissuinerit assigiinngitsunik paasisaqarfiupput
Timmisartortartoq tyskeq Germanwingsip timmisartuutaanik marlunngormat qularnanngitsumik piaaruluni nakkartitsisoq, tarnip pissusaanut nakorsanit siornatigut katsorsarneqartarsimavoq, nakorsanillu siuniutinut tunngasunut immikkut ilisimasalinnit aamma misissorneqartarsimalluni. Tysklandimi aviisit ilaat Welt am Sonntag taama allaaserisaqarpoq.
Timmisartortartup ajornartorsiutai ajutoortoqarsimaneranut atatillugu misissuinermut pingaaruteqarput, timmisartortartullu Andreas Lubitzip iliuuserisimasaanut suut tunuliaqutaanersut sukumiinerusumik maanna paasiniarsinnaaleritsik, Jean-Pierre Michelip, franskit politiivineersup, nutaarsiassaqartitsivimmut AFP-mut oqaatigaa.
Immiussat karsi qernertumik taaneqartartumiittut aallaavigalugit maannamut paasisat naapertorlugit maanna paasineqarpoq Lubitz, timmisartup aquttarfiata matua piaaraluni parnaarsimagaa, taamaalilluni timmisartumi naalagaq isersinnaajunnaarsissimallugu.
Andreas Lubitzip tarnikkut nappaateqarnini sulisitsisuminut piaaraluni isertuussimagaa, Tysklandimi unnerluussisussaatitaanerup oqaatigaa. Tassami pappilissat Lubitzip nappaateqarsimaneranut takussutissat angerlarsimaffiani nassaarineqarsimapput, nakorsaatinik atuineranut takussutissat nassaarineqaramik.
Napparsimanermik nalunaarutit sissukkat, allaat ullormi ajutoorfiusumut ullulikkat nassaarineqarsimapput. Paasissutissalli nappaataanut tunngasut sukumiinerusut saqqummiunneqanngillat.
