Timmisartortartoq nakkartoq sikutamit annanneqartoq
Russeq timmisartortartoq Sergey Ananov sapaatip akunnerata naanerani unnuaq ullorlu nilleqisumik atorpai.
Aviisi National Post malillugu nunarsuaq kaajallanniarlugu kisimi timmisartumik angalavoq, Ikersuaq Davids qulaaqqullugu qulimiguulik R22 Robinson ingerlataa aserorpoq, immamullu nilleqisumut Baffinnip qeqertaata Kalaallit Nunaatalu akornannut nakkarpoq.
Pisoq ulorianaqisoq nalaappaa, iluatsitsillunilu annanniutiminut qaqivoq atallaallu annanniutit atillugit.
Tiimit 32-it utaqqisoq
Kingorna Ananov sikutaq anngajaaq issiavigisinnaasani ornissimavaa.
Canadamiut ujaasisartut qullersaqarfiata qulimiguulimmit ajunaalernermik kalerrisaarut tusarpaa. Akunnerillu 32-it sikutami issiareerluni Ananov kiisami iluatsitsivoq. Canadamiummi angallataata alapernaarsuutip Pierre Radissonip ataasinngornermi ullaap tungaani nassaaraa. Nillersimaqaaq masannarlunilu nannullu arlallit perlilerpasittut alaatsinaassimagaat, alapernaarsuummi oqaaseqartartoq oqaluttuarpoq.