Timmisartorlutik angalasut amerlanerusut
Naatsorsueqqissaartarfiup kisitsisaatai nutaat naapertorlugit, Nunatsinni mittarfiit nunanut allanut ingerlaqqiffiusartut ilaasunit 19.235-init ukiormanna apriilip qaammataanit juunip qaammataata tungaanut aqqusaarneqarsimapput.
Angalasut siornamut naleqqiullugit 10,5 procentinik amerleriarsimapput 1.825-inik ilasimallutik.
Taakkulu ilarpassui takornariaapput.
Juunip qaammataani atlantiku ikaarlugu angalasut 30 procentii sinnerlugit Danmarkimeersuunatillu nunatsinneersuunngillat.
Akunnittarfinni unnuinerit aamma amerlanerupput
Tamannalu aamma ukiormanna kvartalip aappaani akunnittarfinni unnuinerit pillugit kisitsisini takuneqarsinnaavoq.
Unnuisarnerit katillugit 56.269-iusimapput. Tamanna ukiup siulianut sanilliullugu 1.649-nik amerleriaateqarfiuvoq. Inuit piffissami tassani katillugit 21.605-it unnuisimapput, taamaasillunilu unnuisut siornamit 12,1 procentinik amerlanerullutik.
Air Greenlandip juunip qaammataani aatsaat taama ilaasoqarsimatigaluni juulimili nalunaarutigaa.
Siuariartornerlu nunani allani niuerfinnit aallaaveqartoq Air Greenlandip pisortaanerata Michael Højgaard taamani oqaatigaa.
Aammattaaq Tysklandimit, Tuluit Nunaannit Amerikallu avannaanit angalasut aasaq manna amerlanerusimasut ilanngullugu oqaatigaa.
